男神黃子華會同陳法拉將於7月1日喺灣仔演藝學院演出舞台劇《前度》，初時宣佈演出18場，不過觀反應超熱烈，所以大會喺門票正式發售前夕，宣告加開7月22至28日共6場（逢周一休息），現總場數共24場，門票仲喺今日正式公開發售，唔少fans當然拎定櫈仔喺去排隊買飛，點都要一睹男神嘅風采。

門票喺今朝10點開始發售，不過喺尖沙嘴通利琴行，9點左右已經見到有過百人喺度排隊，但係人龍唔多見南亞裔炒飛黨排隊，多數係fans。排第一個嘅A先生話今日凌晨12點開始排，不過因為佢要返工，所以唔願上鏡，仲話係幫朋友買，同佢一齊排隊、唔願上鏡嘅李小姐話自己鍾意子華，會買晒咁多場嘅飛。

排第7位嘅李小姐話今朝6點已經嚟排，佢同朋友抽生死籤，抽輸咗咪負責嚟排隊，不過佢今次係捧陳法拉，佢話：「我係法拉fans，自從《衝上雲霄2》之後，已經有3年冇見過佢，如果睇子華應該係睇talk騷，今次我會睇2場，亦都會幫埋朋友買。」今次係每人每次限買6張飛，佢話覺得唔係好啱，已經有內部認購，應該係買10張。至於會唔會覺得好期待？廖小姐話：「咁又唔使，之前喺澳門睇過子華嘅talk騷，仲係第一行握手位。」但係子華話唔再做棟篤笑，唔知又會唔會失望？佢話：「香港冇嘢好笑，日日好似年初一咁，係唔得㗎嘛！」

本身係子華fans嘅黃小姐，佢話今朝8點嚟排隊，不過已經覺得自己排得好後，所以都預咗買唔到，但係亦未必會買貴飛，炒得好貴，佢又讚子華啲演技，令佢感覺深刻。

開賣2個鐘已經賣晒所有貴飛，而平價門票只有啲單丁位，子華男神一出，就算唔係演棟篤笑都一樣咁多人捧場！