當網民力捧嘅男神黃子華都被另一位「真‧男神」感動到，大家係咪好想知道呢位「真‧男神」有乜料到？

黃子華今年擔任「無國界醫生日」榮譽行動大使，認識咗無國界醫生救援人員陳健華醫生（Akin），對Akin讚不絕口。咁又係，嚟自草根家庭嘅Akin自小立志成為無國家醫生嘅一分子，完成外科訓練後坐言起行，2011年加入無國界醫生，每年抽兩個月參與救援，到過地方包括巴基斯坦同南蘇丹。

Akin話好多時喺呢啲地方，自己都係唯一嘅唯一醫生，無論開刀剖腹產子或者骨科手術，都由自己一手包辦，同病人嘅關係好密切，滿足感都好大。而最驚險一次事件則發生喺南蘇丹，佢話當時有執法人員同醉酒嘅犯人喺距離醫院約500米嘅地方發生衝突，現場有槍聲同手榴彈爆炸聲，有傷者被送到醫院，但佢話唔算太驚，因為聽慣咗槍聲。

子華聽完呢啲救援點滴，大讚Akin先係港人口中嘅「男神」，係男性嘅典範，好似佢咁高大靚仔嘅外科醫生，原來可以喺香港過好好嘅生活，卻肯到偏遠地方參與救援。Akin則話都要多謝家人咁支持佢。

口講支持冇用㗎，子華話會響應無國界醫生嘅呼籲，捐出一日人工支持7.7「無國界醫生日」。

兩位男神對談短片：
https://www.youtube.com/watch?v=DzZx2s1r_IA

黃子華背後嘅Akin，係佢心目中嘅「真‧男神」。