鄭秀文演唱會頭場因病爛聲走晒音，甚至內疚地哭求歌迷退票，睇到觀眾心都痛埋。好彩，一班Fans同好友齊齊為佢集氣，佢第二場唔喊喇，依然搏盡做好成場騷，話自己雖然靚聲欠奉，但有力又有靚衫幫補。點止呢？仲有嘉賓黃子華嘛！子華神於台上妙語連珠即場棟篤笑，仲開金口唱歌，觀眾實收貨啦！

雖然聲帶未好番，但敬業的鄭秀文（Sammi）前晚繼續於紅館開第二場騷，仲有「子華神」做嘉賓呀！佢出場時先叫Sammi無論如何都唔可以回水，仲清唱幾句Sammi同老公許志安的名曲《其實你心裏有沒有我》，回帶講番09年安仔上台扮同Sammi唔熟，但相反子華自嘲要在台上同只合作過一場戲的Sammi扮熟，令觀眾哄堂大笑。子華直言Sammi同安仔係觀眾心目中的童話，佢話：「金童玉女，曾經爆咗煲，然後破鏡重圓。你哋一齊係有社會意義同責任，點解？因為今時今日嘅香港少咗好多童話呀！如果許志安鬧你，你可以同佢講：『收聲！唔係為咗我，係為咗香港！唔好駁嘴，要大局為重。』」子華神更催安仔同Sammi生B，稱已經為兩人仔女取名做「勝不許敗」，並謂：「三母子走出嚟，許志安、鄭秀文、許勝不許敗，贏晒！」全場觀眾即刻拍手叫好。
縱觀整晚演出，雖然Sammi連說話都不斷走音，但確實係傾盡全力演出，尾聲時，Sammi問：「多謝你哋！雖然把聲沙，但我有6個字想講，有幾多畀幾多，個騷好唔好睇呀？」呢個問題，相信可以用Sammi今次演唱會主題曲回答，就係《犀利》！

子華神唔易請，但Sammi就請到對方做嘉賓，仲大放笑彈。