黃子華同陳法拉主演嘅舞台劇《前度》24場門票今日開賣，短短2粒鐘被秒殺，原來女神法拉已經由紐約返港，今朝仲喺facebook玩直播：「大家好呀，早晨，估吓我喺邊度，我返嚟香港啦，呢度係Time Square，我返咗嚟香港啦！」

原來今日法拉去銅鑼灣學廣東話，佢話：「其實已經開始綵排咗兩日，今日第三日啦，一切都好順利，劇本好好玩，今日我唔係嚟行街，今日其實會去廣東話老師度上堂，今日係第一堂，我差唔多兩年長期喺美國讀書啦，好少講廣東話，加上廣東話麻麻哋，所以要再練囉，今日上堂學廣東話，主要讀劇本入面角色嘅嘢，想練到對語言感覺再熟悉啲，廣東話，返嚟啦！」

網友都留言讚：「好嘢，廣東話萬歲」、「增值，好呀」、「你廣東話都好好呀」、「好靚女呀，搞到我唔想開工做嘢」、有網民呻買唔到飛，亦有網民溫馨提示法拉小心走路，唔好邊玩直播邊行路，好危險！

之前有網民話擔心ABC嘅法拉做舞台劇，如果現場冇字幕嘅話，有啲驚聽唔明法拉講乜！呢兩年法拉喺外國讀書，真係好少機會講廣東話，為咗唔令觀眾失望，返到香港就好勤力去上堂學廣東話，為舞台劇做足準備功夫備戰，話晒面對男神子華呢位超班高手，點都要嚴陣以待。

法拉喺2013年離開大台後，呢兩年喺紐約嘅茱莉亞學院（The Juilliard School）修讀戲劇碩士課程，呢間學校好巴閉㗎，已故喜劇巨匠羅賓威廉斯（Robin Williams）、金像影帝奇雲史帕西（Kevin Spacey）、已故「超人」基斯杜化李夫（Christopher Reeve）都係呢間名校嘅學生。網上仲有一條短片係法拉與同學上堂嘅情況，身為唯一香港學生嘅法拉，喺片中都有一秒鏡頭㗎！

而今晚7點幾，法拉仲係ig到上載咗一張同子華排練嘅新相，留言話：「排練你們想看嗎？」當然有好多網友回覆話想睇啦！

法拉喺ig到上載咗同男神黃子華排練嘅新相。

黃子華同法拉主演嘅舞台劇，將於7月1日公映。

法拉問大家係咪好想睇佢同子華做舞台劇喎！