86歲「修哥」胡楓一連兩場嘅紅館騷《胡楓86破晒紀錄演唱會2018》噚晚尾場完滿結束，嘉賓陣容有張家輝、吳鎮宇、張達明、曾志偉、賈思樂、陳百祥、王祖藍、阮兆祥、李思捷等。

講到最驚喜就一定係男神黃子華現身，一上到台就同修哥講：「你請咁多人嚟，冇請我喎。」修哥話唔敢請，因為子華有戲上，要做好多宣傳、謝票等，知子華好忙。子華笑言：「套戲聽日（今日）首映，但我唔係為套戲上嚟嘅。」佢仲問修哥咁多人上嚟，有冇人俾張櫈修哥坐，仲叫修哥喺台上坐低：「雖然我知你好憎坐，係咪？」子華先安排修哥坐低，仲問大家修哥有冇資格坐，觀眾都大叫「有」。

子華自嘲全香港得修哥一個有資格坐喺度做：「我棟篤咗十幾廿年，我坐都係坐樓梯口，只有你可以由頭到尾都坐喺度。」子華又話修哥唔會放過佢，每次都窒到子華無話可說為止。之後子華提到《三個小生去旅行》，佢提議由修哥帶隊，自己頂上，而修哥搞笑講搵多個譚校長。不過修哥稱要問公司，因為佢哋人工高，驚請佢哋唔起，而子華就話：「陪你去喎，唔收錢都去啦！你身手不凡喎！」提到四哥同曾江不和一事，修哥即時話：「呢啲做戲啫！」

子華大讚修哥精靈，仲話：「知唔知點解修哥咁精靈，因為佢好少坐。我喺TVB拍劇，有條走廊成公里咁長，佢唔坐，我就坐喺度度劇本，佢就好精靈咁，由嗰頭行去嗰頭。然後有一晚我真係好驚，我真係以為你上身，行行下喺度做運動。」子華又爆修哥對佢有恩，當年喺伊利沙伯體育館表演十幾廿場，人數就等如六、七場紅館，當時心諗：「使乜做紅館吖，我都做到佢六、七場嘅人數。其實係修哥同佢講『唔得，你要去紅館』，你記唔記得？」修哥即答：「記得，我話你做就嚟紅館做啦！」子華話原來修哥搵佢嚟試刀：「今日嚟到紅館綵排，你90歲嚟到開騷，我幫你伴舞。」修哥即刻話：「我試刀？我使試刀？我70歲嗰時，16年前呀！已經喺呢度開騷，我使試刀？」子華就向修哥跪拜致歉，最後子華就話：「今日修哥你小場大用。」

86歲「修哥」胡楓一連兩場嘅紅館騷《胡楓86破晒紀錄演唱會2018》噚晚尾場完滿結束。

不過講到最驚喜就一定係男神黃子華現身。

子華大讚修哥精靈

佢仲搞笑，向修哥跪拜致歉。