【跟住男神上六層樓】黃子華大角嘴唐樓「登高」冇難度

2016年5月20日 | 蘋果日報

男神黃子華同陳法拉嘅舞台劇《前度》早前公開發售24場門票，短短兩粒鐘已被掃清，只係剩番啲單丁位，就知子華神有幾大魅力，而陳法拉差唔多兩年長期喺美國讀書，好少講廣東話，目前講廣東話麻麻哋，所以要佢都要再練習兼上堂學廣東話。

黃子華近日努力綵排舞台劇，今中午12點左右，揸車由北角寓所去大角嘴，將架車泊咗喺一個爛地停車場，落車發現有記者在場，佢都好nice，只係問在場記者係邊間報館，子華沿路都chok到爆咁拎住把傘，不失子華神嘅風範。佢仲好有氣力咁一口氣行上唐樓六樓，去到一個叫「水泊劇場」嘅地方，梯間貼有一個「90Club」嘅紙、另有一張「假普選方案一定唔袋得」嘅poster。子華行上樓梯時都好友善，任由記者影相，行到去門口，佢就笑笑口：「大家唔好再跟嘞！」之後佢就入咗去準備綵排。