黃子華、葉童、楊秀惠等昨日為無綫新劇《奸人堅》拍攝外景，劇情講含冤的子華被判死刑，要飾演自閉症的楊秀惠到刑場救他，子華表示剛拍攝一場臨死喊戲，喊到口水鼻涕流晒，認真核突。

子華笑言自己每次喊，都有奇景睇，就是鼻涕多過眼淚。他說：「自己喊親都好大鑊，鼻涕多過眼淚，可以話係一滴眼淚十滴鼻涕，其實我平時食野都會流鼻水，所以出街一定帶紙巾，如果唔係都幾樣衰。（使唔使睇醫生？）唔使，不過如果《十兄弟》開新角色，就搵我做大鼻窿，代替大口九角色。」

葉童佩服記性強
至於，飾演自閉的楊秀惠，為求令劇情更加好笑，不惜犧牲靚女形象，以蓬鬆頭髮、雀籠笠頭造型上陣，她說：「我呢個自閉角色係以搞笑為主，好似做番小朋友咁，好可愛，其實劇裏我有三不同個性，我最鍾意係自閉呢個個性，白白癡癡咁好似現實中嘅自己。」

此外，葉童透露四月要到上海拍劇，坦言時間十分緊迫，令她相當擔心，她謂：「而家都未出晒劇本，進度比我預期的慢，所以好驚趕唔切，監製就話《奸》劇四月中會拍完。呢套係笑劇，個個想搞笑所以都會改對白。（係咪黃子華成日改劇本？）各人對角色都好投入，大家都係為套劇出力。子華好犀利，記性好好，好少ＮＧ，我都好佩服佢。」

葉童笑指黃子華經常改對白。