黃子華昨為主演舞台劇宣傳，問到是否太多人做棟篤笑，為免惡性競爭改演舞台劇？子華謂絕對不是，今次只是為了滿足個人欲望，連酬勞多少都無所謂，最緊要有得演，一圓自己五、六年前的願望！

黃子華、鄧偉傑和陳淑儀，昨日出席由英皇娛樂集團呈獻的《男磨坊ＡＲＴ》舞台劇記者會。眾人將大衞像下體的紙牌揭開，預祝場場爆滿。黃子華否認因太多人群起主演棟篤笑而改投舞台劇懷抱：「如果我要做棟篤笑，夠晒料我就會做，無題材可以乜都唔做添！呢套劇我五、六年前已經好想演，今次英皇斥巨資買入版權，我係為咗滿足感而演出，唔知依家好多人做棟篤笑。（天價酬勞？）今次係為滿足個人欲望，酬勞唔係考慮因素。」

朋友捧場自掏腰包
問到會否與好友張達明的棟篤笑打對台，他說：「應該我完咗先到佢演出，我會捧佢場！」他笑言今次不是自己製作，不敢叫朋友為自己捧場：「我自己都無飛，叫得一個可能跟住有一百五十個，每人兩張都三百張，我點嘔出嚟呀？我寧願下次自己搞棟篤笑先請佢嚟，今次幫吓手自己買飛嘞！」在新劇中，黃子華的角色十分乞人憎，問到覺得性格與現實的自己是否相符時，子華笑言：「唔似，我無咁熱情，劇裏面個主角因為太愛一個人先至乞人憎啫！」

黃子華否認體重下降，指西裝是五、六年前購入仍十分稱身。

黃子華與演員鄧偉傑（左二）、陳淑儀（左三）及英皇高層吳雨（右四）等，預祝舞台劇成功。