黃子華，四十八歲，活躍娛圈逾廿年，視演戲為終生職業之一，最近「重操故業」，回歸舞台劇界「圓夢」，夥拍劇界兩位殿堂級人馬鄧偉傑及陳淑儀，合演《男磨坊》，演藝路上驀然回首，子華不乏無奈加滄桑。

「大學畢業左右，我發現自己愛上表演藝術，熱情且衝勁澎湃，於是自修演技，又向大小劇社毛遂自薦，甚至去電影公司及電視台敲門，參加甚麼甚麼比賽打算入行。由原本以為自己一定得，到後來心諗『唔得都係應該嘅』，輾轉加入香港話劇團，但兩年下來發覺要喺幾廿人中突圍而出談何容易？當時年少氣盛的我與總監發生摩擦，豁出去另謀出路。」

「結果冷靜下來發現要面對現實：生活費點解決呢？忽然想起自己有大學文憑，於是學人跑去考警察貪人工高，當時心諗做戲最緊要有生活體驗，警校受訓可以自我增值又有錢收，何樂而不為？點知個考官聰明到睇穿我嘅打算，結果如意算盤又打唔響，惟有再想法子。」

命運的諷刺
「我喜歡『演』，但低潮時難免諗過放棄，當年籌辦《棟篤笑》就係想痛痛快快幹一次，為黃子華這位『藝壇奇葩』留下一點回憶，然後轉身走人！點知命運好諷刺，呢個 talk show 出奇咁成功，令到許冠文賞識我請我寫電影劇本，滿心歡喜以為今次可以拍戲，點知男主角最終落喺黎明手裏！」

「坦白講，我演過好多『冇前途嘅電影』，當時以為拍多幾部咁嘅戲，或許會換回一啲『有前途』嘅機會。但係事實告訴我，這圈子好特別，做咗『冇前途』嘅事，人哋會覺得你理應『冇前途』落去，依家除非個劇本好吸引，否則唔拍應該都冇損失。」

會揀有拖拍
「演舞台劇的吸引力同演電視、電影有好大分別，比方說，如演電視或電影等於『盲婚啞嫁』嘅話，咁做舞台劇形同一對男女在戀愛。演電視、拍戲嘅角色，性格往往一早被鎖定，唔似舞台劇咁有時間畀你去揣摩、創造，慢慢摸索到最滿意。坦白講演電視嚴重缺乏休息時間，要享受『演』的過程根本力不從心，有得揀的話，梗係『有拖拍』比較開心啦！」

「今次有機會演《男磨坊》，其實我鍾意呢個劇本好耐，『圓夢』之後你問我仲想演咩劇目？一時間我都答唔出。其實一個好嘅劇本可以為演員減去唔少壓力與難度，我唔擔心票房，接下去嘅日子，我會好好享受同兩位拍檔『鬥戲』的快感。如果你問我這些年來在『演』方面付出的努力係咪達標？容許我賣個關子，我有計劃日後舉行一次《娛樂圈血淚史》，到時可以慢慢講……」

由舞台踩過界
本來是舞台劇演員搖身變為藝人的大不乏人，他（她）們大都是好戲之人，當中不少已成導師級人馬。
蘇玉華：92年演出《我和春天有個約會》後即涉足電視圈，由綠葉到成為劇集主角，更憑一手出色廚藝贏得「美女廚神」稱號。
張達明：演藝學院出身、曾是中英劇團一分子的達明，由舞台劇界轉戰影視界，最近靜極思動在大陸及香港舉辦《人仔無敵棟篤笑》。
羅冠蘭：曾是香港話劇團當家花旦，近年參演多齣無綫劇集，又擔任藝訓班導師，桃李滿門。

藝術有價
《男磨坊》先後獲得英國奧利花戲劇獎「最佳喜劇」及美國紐約戲劇評論大獎「最佳戲劇」等殊榮。今次以六位數字金額取得劇目版權，原作者自然要求多多，連宣傳品上出現「黃子華」三個字，亦要求字體要比《男磨坊》細小。

子華與記者談起版權費時打趣說：「攞個版權唔難，乜嘢都係錢字啫。（藝術喎！）藝術咪一樣可以以銀彈打動。」

黃子華形容演舞台劇一如談戀愛，他渴望「拍拖」。