黃子華舞台劇七一開騷暫定18場最貴飛賣$880

2016年4月27日 | 蘋果日報

男神黃子華噚晚喺facebook專頁公告嚟緊會做舞台劇，女主角係從未合作過嘅女神陳法拉，夠晒新鮮，子華嘅post一出，果然箭不虛發，唔少fans引頸以待紛紛留言問開騷日期等，準備撲飛，雖然大會至今仍然保密所有資料，不過《蘋果》收到可靠消息，據知今次子華嘅舞台劇訂於七一開騷，由七月一日公演至廿一日，逢星期一休息，暫定十八場，地點係灣仔演藝學院歌劇院。

至於票價方面，最貴飛訂價係$880，其次為：$680、$480、$380、$280，以舞台劇嚟講，最貴飛賣$880，呢個價錢仲貴過陳奕迅同鄭秀文嘅演唱會飛！話晒上次子華喺2012年公演《野豬》舞台劇，票價都係$420、$360、$280。