噚晚有一個「地道香港仔」突然宣佈「收咪」。熟悉子華嘅Fans會明白，因為子華神真係已經唔係第一次話「最後一次」——留意番，唔係話子華神次次開棟篤笑都話係最後一次，而係，佢不止一次於訪問中提到，準備開最後一次棟篤笑。

真正的子華神信徒，心中明白，亦心中有數，深知子華這個決定，計劃經年，不是衝動。

套用番2016年子華接受「燈神」蕭若元訪問時所講：「我冇乜遺憾，我江郎才盡咗好多年，但江郎才盡得嚟，我仲好有興趣做多一次棟篤笑，但你放心，唔會係呢一、兩年嘅事，因為我都做唔到。

「我想釐清一樣嘢，我喺香港過咗咁多年，我係地道香港仔，依家由我認識嘅香港發展到今日香港，我點能夠說一個香港故事，或一個我自己嘅故事，而同大家棟篤笑多一次。其實好多嘢笑唔出，唔知點笑，大勢係悲觀，人類從來都係悲觀嘅，作為一個香港人，我希望嚟緊一個騷，去總括一下自己。」

但不熟悉子華的人，總以為今次突然宣告「收咪」，是一個宣傳伎倆。

所以噚晚子華接受傳媒訪問後，再補拍一條片，標題十分簡單，就係：唔好意思，不厭其煩，最緊要清楚。

條片有兩個重點：
1）今次真係，真係，真係黃子華原則上最後一個棟篤笑。（相信子華唔會玩食字玩到一個地步係下次開「坐篤笑」）
2）呢個棟篤笑，不設巡迴。「好多人仲問緊幾時巡迴呀咁，咁我再解釋多一次，呢個騷係唔會巡迴，唔係因為係一個最後嘅騷，而係因為呢個騷嘅主題，主要係講香港嘅。
「呢一次，係一百份（之）零，唔係，係101%，香港本土嘅題目。所以如果我去第二度巡迴，係對大家不負責任。所以係唔會巡迴。同埋的而且確會係最後一個棟篤笑。咁呀……多謝大家留意。」

今次子華呢個《金盆浪口》棟篤笑，暫定有12場，是否加場視乎反應。十八禁。即不歡迎十八歲以下人士入場。

不少未夠秤嘅網民都激動留言嗌唔好，亦有人話：「如果今次都睇唔到，就真係同絕種動物一樣，只能從紀錄片中重溫。」

就咁嘅，香港人買演唱會飛，難度同買樓差唔多，特別係依家亞博館唔再同快達票合作、改同炒飛網／中介網站StubHub合作，由StubHub負責賣飛，包括25%最靚位仲要同大陸人爭，真係好灰。

今次子華神呢位「地道香港仔」講明，佢呢個最後棟篤笑，係講香港本土。

咦，咁講法，鄰近經濟強國嘅人，未必睇得明，睇完又要鬧，咁不如唔好搶飛喇，留番「地道香港仔」黃子華最後一個棟篤笑俾香港人。

因為地道香港人已經再笑唔出。唔該晒。