2014年10月，香港正值佔領行動，黃子華在紅館舉行棟篤笑《唔黐線‧唔正常》。

首場於10月6日舉行，子華一開始已打趣謂：「我冇預備講呢樣嘢㗎嘛！我年半前就準備好晒講乜嘢㗎喇，忽然搞啲咁嘅嘢……但唔講我又有啲唔爽，所以俾我講埋呢幾句，ok？」又說：「咩時勢呀？仲咁歡樂？成何體統呀？依家仲有心情嚟聽人講笑，呢啲咩人嚟㗎真係！講真，冇心情睇嗰啲，就喺嗰個出口（指向出口），就好走喇下，係冇回水㗎。如果你想嗌回水呢，依家已經好落後喇，依家嗌回水，不如你試一下：『倒抽一口涼氣』。」但可能以後都冇得聽「回水」了。

子華還講到他參加了「佔旺」，感受香港人美麗一面：「證明咗我哋香港人嘅品質，係真係幾咁勇敢，幾咁和平，幾咁善良。而對我哋嚟講，對我哋下一代嚟講，呢方面已經唔需要再考驗。智仁勇，仁勇我哋都兼備，未來嘅考驗，係智慧。」

10月10日是一個特別的日子——時任政務司司長林鄭月娥代表政府宣佈拒絕與學聯對話，「雙學」呼籲市民再度逼爆金鐘。在對面海紅館開騷的子華，講到雨傘革命體現了港人美麗一面，說到「我哋都係光明磊落嘅香港人」，講到「光明磊落」四字時，子華不禁哭了。

子華續道：「香港係有病，而呢個病，係視乎你睇佢有幾輕或幾重，去決定係佔中，定反中——呀，反佔中嘅位置。對唔住呀各位，我今日有嚴重嘅傷風，所以我食咗好重嘅傷風藥，好口乾……」

「即係你係佔中，定反佔中，係睇你，視乎香港呢個病有幾重。我聽過一男一女對話係咁嘅：『你想整容呀？整容可能變成毀容呀！』拿，信呢句話嗰個人，可能就係周融喇，唔好亂搞嘢，『毀融』。」

「咁佔中嗰班呢？你聽埋第二句喇：『你想整容呀？整容可能變成毀容呀，不過對你嚟講都冇乜分別啦。』即係香港點解會搞成咁嘅呢各位？」