28年嚟14個棟篤笑，黃子華一直都陪住香港人成長，當大家理所當然地認為子華神會一直陪住大家，但事實總係殘酷，今日子華神就宣佈「收咪」，七月嘅《金盆「浪」口》將會係子華神嘅最後一個棟篤笑，呢個消息簡直係香港人嘅哀號，同吹起末日號角冇分別。

不過如果大家有留意子華的話，其實一早就有先兆，好似年前子華都講過，香港已經冇嘢好笑。但喺再早之前，講緊嘅係2003年嘅時候，子華接受周刊訪問，佢就話諗過最後一個棟篤笑嘅名，就係《金盆「浪」口》。

當時子華都講過，以為自己係無可奈何先會做棟篤笑，但後來發現，佢一世人都避唔開棟篤笑，因為一早就流住棟篤笑嘅血。