《萬千星輝頒獎典禮2013》今晚舉行，張智霖以大熱「Cool魔」一角幾乎坐定粒六穩奪「視帝」一獎，Cool魔前晚更揚言造定靚衫等攞獎！至於對手黃子華前晚亦在同一場合現身，先暗示會缺席頒獎禮，翌日更宣布會缺席。不過，一眾候選視帝亦有體育精神作最後拉票，「三屆視帝」黎耀祥昨寄望攞「最受歡迎電視男角色」，馬國明則直言人人有機會！

一年一度的《萬千星輝頒獎典禮2013》今晚將於電視城舉行，今屆提名「最佳男主角」的猛將競爭激烈，當中憑《衝上雲霄II》入圍的「Cool魔」張智霖（Chilam）呼聲最高，前晚他跟另一名「視帝」熱門黃子華在阮兆祥的《1祥朋友演唱會》上碰頭，擔任壓軸嘉賓的Chilam，高姿態地以私伙「機師look」亮相，而台慶當晚更會準備另一套靚衫，問他是否想攞視帝？他答：「希望啦！」他更風騷與祥仔合唱《歲月如歌》，並笑稱：「呢個演唱會好似頒獎禮嘅前哨戰，大家都趁機會拉票。」隨即與祥仔上演一幕纏綿咀嘴戲，連祥仔也笑嘲：「你為咗拉票不擇手段！」

宣布缺席頒獎禮
子華甫出場即獲觀眾大叫「教主」，又與徐子珊自彈自唱《My盛Lady》主題曲。受訪時，問到會否出席台慶頒獎禮？子華竟抵死地暗示會缺席：「聽（昨）日睇吓通勝先，如果寫『大凶』就一定去！」對於今年對手強勁，子華說：「年年都強勁㗎啦，我拍親次次都有得玩（提名），有得玩已經好滿足。」昨日現身童裝專門店開幕時，子華更直認不會出席無綫頒獎禮。

黃子華與徐子珊前晚以劇中情侶檔現身，並大唱主題曲。

黃子華昨日直認不會出席無綫頒獎禮。