黃子華拍外賣平台廣告呼籲港人勿只顧搵食 講足100秒似開Talk Show

2021年5月21日 | 蘋果日報

子華神出關喇!

疫情影響全港經濟,但卻造就了外賣平台生意急增,幾間專做外賣速遞平台的公司,輸流找藝人拍廣告壯大聲勢,最近黃子華亦加入戰團,踢走為品牌代言好一段時間的鄭嘉穎,拍攝了一輯全新廣告片。

事實上,子華廣告產量向來不多,對上一次拍廣告已經是接近3年前的信用卡廣告,故他有新廣告出街,即時引起大家的關注,子華在短短100秒的廣告中,由頭講到落尾,似足平日站在台上開Talk Show,都幾肯定觀眾會由頭睇到尾,相信這就是廣告成功之處。

廣告片今日曝光,廣告以「點止搵食咁簡單」為口號,由精神、信仰、家人再講到尊嚴,透過提醒香港人不要只顧「搵食」,帶出外賣平台已不只提供叫外賣服務訊息。廣告中的對白,亦說中了不少港人心聲,當中包括「香港人搵食世界第一!因為喺香港人嘅生活之中,搵食排名第一!」、「搵食係精神,搵食係信仰,但係淨係搵食,倒頭嚟我哋搵到啲乜?」、「搵到份工,你老竇老母搵唔搵到你?」之後,子華又問大家「你真係好鍾意返工呀?有無時間搵鍾意嘅人?」、「搵到餐餐九大簋,係咪已經捱壞咗副偈?」最叫人值得反思的有「你搵到個首期,又有幾多時間留喺屋企?究竟係搵食無得揀,定係我哋喺搵食同生活之間,淨係揀咗搵食?」

子華去年賣樓投資賀歲片《乜代宗師》,電影上映遇上疫情,令香港及大陸的片房都受嚴重打擊,票房谷到盡都只有約3000萬左右。而他過去一年多,幾乎沒有現身公開場合,神隱一段時間忽然有廣告推出,的確頗有新鮮感。子華經理人接受《蘋果》電話訪問則表示,廣告片「橋好」是促使子華接拍的原因。她說:「條橋畀子華睇嘅時候已經係咁,之後大家開會,都係微調一啲好細微嘅嘢,出嚟有咁好反應,當然好開心,credit係要畀返製作同廣告公司,真係好多謝觀眾咁支持。」

至於,在社交平台轉載子華廣告片的林日曦,今日接受《蘋果》訪問時笑言,自己只是應品牌邀請出一個貼文,並沒有參與今次廣告製作,還笑指自己寫「大咗」,現在像騎劫了子華及《蘋果》,感到不好意思。問他可有機會跟子華合作,林日曦表示子華永遠會放在首位,但絕對不可以輕舉妄動,一定要度好劇本才邀請,要一擊即中。

EVXFVMOWONA5PEZJIIBQZPVENM

子華對上一次拍廣告已經有差不多三年,今次在100秒廣告片中由頭講到尾,似足開Talk Show。

B2475UMYP5F73O5UUZKCQ7WSRE

子華在廣告中問大家,搵到食,但搵唔搵到「樽鹽」。

IVUWGL3RSRHKPPGMTN76NIUHWI

子華說中了不少港人心聲,當中包括「香港人搵食世界第一!因為喺香港人嘅生活之中,搵食排名第一!」

6MDAPYYX3NFI3HKIMP4DDXBXWY

子華經理人表示,因為子華覺得廣告「橋好」所以接拍。

C3H5UPBGHVGTLN2GTPG3XJX4PY

子華取代鄭嘉穎成為廣告代言人。