「男神」黃子華又出動喇。前晚facebook「黃子華—子華本部」分享一段長11分鐘嘅「黃子華行樓梯」短片，呼籲「請狠狠分享散播」，至噚晚已經有8000幾個share。咁究竟黃子華行樓梯有乜嘢特別呀？

原來短片係黃子華再為慈善機構「惜食堂」拍嘅。片段開首直擊子華喺一幢唐樓行9層樓梯，探訪一名住喺天台嘅婆婆。片中所見婆婆家中狹小，無廁所，又有漏水問題。

子華之後陪婆婆落樓，到訪惜食堂喺深水埗設立嘅新飯堂食飯，下午4點幾已經人頭湧湧。食完飯，子華護送婆婆返屋企，再次慢慢行9層樓梯，其間更向婆婆撒嬌話，「唞吓先啦，我行唔到喎，等等我！」

網民話男神令捐款網當機
片尾子華感性呼籲，話其實現有款額只夠食堂維持一年多，呼籲市民每月定期捐款畀惜食堂。佢話﹕「中國有四句名言……有錢出錢，有力出力，多多都益善，少少都唔拘」，又感慨話覺得小小一個飯盒，已可幫到婆婆「行到呢9層樓梯」、「覺得有人關心」。

子華短片一出，網民話子華吸引力太大，致惜食堂捐款網頁一度當機，「男神，你搞到人哋嘅捐款網頁冧server」。Emily見網頁喺噚晚已恢復正常，有心人可入去隨緣樂助（www.foodangel.org）。

「黃子華行樓梯」短片中，佢先行上9層樓到天台探望住喺嗰度嘅婆婆（紅衣者），陪婆婆去惜食堂食飯後，又一齊行樓梯返去婆婆屋企。（YouTube短片畫面）