【演處女舞台劇】口痕撩陳法拉再續前緣！黃子華：她又叫我等4年

2016年7月2日 | 蘋果日報

由黃子華、陳法拉同劉俊謙主演嘅舞台劇《前度》噚晚（1/7）正式公演，連埋加場合演35場，醉心演戲嘅陳法拉，在事業高峰期，選擇去美國進修為期4年嘅戲劇碩士課程，被子華稱為「瘋狂的人」。

今年7月迎接新挑戰，同「男神」黃子華合作處女舞台劇《Skylight》（前度），該劇改編自同名英國著名舞台劇《Skylight》，出自英國政治戲劇元老Sir David Hare手筆，劇情唔止著眼於愛情及兩性關係，更探討角色嘅社會背景及價值觀。

法拉今次可以將過去兩年喺課程上學到嘅新技巧大派用場，同時向大師級子華偷師，對於曾於電影飾演夫婦嘅法拉及子華，今次「再續前緣」默契十足，當初亦因為子華無心插柳，先促成今次兩人再度合作，法拉進修期間，子華無意間睇過《Skylight》，發現劇中兩位前度角色非常適合佢同法拉，隨即隔空邀請，子華表示：「我本來不打算做，純粹口痕說角色適合我們，但法拉竟然『大言不慚』，表示4年後才有空參與。」

機緣巧合下，法拉其後於美國睇過《Skylight》公演，好鍾意個劇本，佢就講：「故事很適合香港人欣賞，然後便開始研究可有機會將該劇帶來香港。」結果唔夠兩個禮拜，法拉抵受唔住故事嘅誘惑，答應子華演出，子華就話：「起初我邀請她，她又叫我等4年，最終演技發燒狂都要找人開刀練習，這是很好的巧合及緣份。」法拉亦賣口乖稱：「這是大好機會向前輩學習。」

提到《Skylight》最吸引之處，法拉認為呢套劇故事複雜，但不失輕鬆幽默情節，「話題不只是感情戲或談及社會話題，是將真實生活中的愛情、親情、成長混合一起，視乎觀眾怎樣看，只要覺得某部分有共鳴，便會擊中觀眾的心。我每次看劇本、其他劇團表演也有不同感受，有時候認為愛情或親情是命題，但有時候又會發現命題是社會主義及資本主義的對話。」而子華則透露好辛苦先拎到劇本，「此劇出自大師手筆，雖然演員不多，但濃度高，含水量很低。」