今日係黃子華《金盆浪口》26場棟篤笑尾場演出，喺紅館嘅觀眾同子華都玩到好投入，子華帶領全場觀眾狂嗌「hehehe」後，跟住話：「睇過嘅人記得做呢樣嘢，你he唔出唔緊要，拍手掌，至於未睇過嘅人，一嚟就睇最收尾嗰場，咁就真係你哋最後嗌嘅機會啦。」全場狂嗌回水，子華大笑：「真係好有力量，但大家唔好怪，因為佢哋睇最後一場，其實之前25場，基本上每場都係講10分鐘度，餘下就係咁樣竭斯底里，各位，金盆浪口真係比較竭斯底里啲，但大家唔需要太煽情，大家都知道搞到今日咁，係你哋迫我，其實今時今日喺香港做藝人，大家知道有幾困難啦。」

今晚尾場觀眾反應特別high，子華講第一part七警時，全場反應比頭場更大；而完咗第一part後，子華拎杯飲水，台下又尖叫拍手，子華話：「依家喺屋企飲水，阿媽都會拍手，平時仲偷偷哋睇我飲水。」之後子華問到底有乜嘢水果好食得過禁果，居然台下有觀眾大叫榴槤，子華就話：「自從第二場有個女人嗌榴槤後，場場都有人叫榴槤 你哋班泰國馬來西亞間諜。」

跟住佢就講到自己嘅記性，話自己好易唔記得嘢，仲好頂唔到講嘢被不停插入嚟，佢笑笑口話：「今年仲頂得住，講到邊呀？（台下大笑起哄）榴槤吖嘛！我知。講到禁果，係嘞，真係唔係講笑，我接受你哋，榴槤勁過禁果。以後邊日你啲男人想去偷食，你就唔好去食禁果勒，你去買榴槤啦！『老婆我今日身痕，我去百佳一次先』『榴槤好食過禁果喎，Mary越摸你塊面越流連呀。』『你嘅音容真係撓口杉手，就像榴槤咁完美。』夠未呀？我不如成場講榴槤都得喎，由你未聽過，到最一般即係『我哋真係流連忘返咯』咁都得㗎喎。」

紅館嘅觀眾同子華都玩到好投入

子華拎杯飲水，台下又尖叫拍手，子華話：「依家喺屋企飲水，阿媽都會拍手，平時仲偷偷哋睇我飲水。」

子華問到底有乜嘢水果好食得過禁果，居然台下有觀眾大叫榴槤。

子華：「我不如成場講榴槤都得喎，由你未聽過，到最一般即係『我哋真係流連忘返咯』咁都得㗎喎。」