鄭秀文（Sammi）昨晚的第二場演唱會，雖然病況未癒，但心態轉變，以正面態度面對的Sammi沒有再哭，還笑到彎腰，全因有黃子華這位表演嘉賓。子華叫Sammi學他，無論如何不適都一定「唔好回水」；又催促她與安仔盡快生B – 許勝不許敗！

Sammi昨晚的聲沙、失聲及走音情況較首場更為嚴重，但她傾全力兌現其6字真言「有幾多畀幾多（觀眾）」。表演嘉賓黃子華現身更贏得掌聲雷動，甫出場即大呼Sammi的走音版，又抵死地重提Sammi曾表示想俾錢退票一事說：「Sammi 陰公咯！但我作為一個把聲成日出問題又病的表演者，我對你有個好大的忠告，就是作為專業表演者，無論幾唔舒服都一定『唔好回水』！事關會影響好多人，呢樣你真係要學我，有人嗌都唔使理佢，嗌的人好幼稚！」

當大家還未笑完，子華已轉話題指：「唔好睇我咁奔放，其實係上台以來最驚的一次，因為我其實唔認識鄭秀文，只見過佢一日，合作過一部戲，戲中做佢老公，雖然離左婚，但戲中講過乜都唔記得，又有幾熟呢？不過就記得你同我講早晨，我問你食左飯未？你又問我有冇睇過19世紀俄國大文豪陀思妥耶夫斯基的《罪與罰》？話有啲唔明，然後我就唔想睬你，因為我冇睇過，我哋對話就咁終止，關係亦就咁結束。」

聽到Sammi笑到走晒音，子華即著對方小心把聲，但隨即繼續發功說：「年幾之後，就話鄭秀文請我做嘉賓，我上網睇，做鄭秀文嘉賓的個個都同佢有關係….但點知睇到一個衰過我，比我搵到人墊底。2009年，鄭秀文演唱會出現左個嘉賓同佢唱左一首歌，我都識唱，但唔使音樂，因為無音樂我就最有音樂感，大家仲要睇住我點樣唱……」說罷即清唱《其實你心裡有沒有我》，還向Sammi愈唱愈埋。聽到全場指當年唱的人是許志安，子華又謂：「你話係咪離譜？安仔最錯係，我同Sammi唔熟就扮熟，佢同Sammi好熟但就扮唔熟！點解？唱呢首歌好應愈唱愈埋，但安仔當年就由頭到尾都企嚮度，我用過尺嚮片段中量度過，佢同鄭秀文的平均距離係15呎，而佢同葉德嫻合唱的一次，平均距離係8呎，仲唔係扮生寶？」Sammi和安仔都分別在台上台下笑到彎晒腰。

子華又問觀眾，安仔和Sammi同台時，有沒有做過親密動作？是否很想安仔跟Sammi講……台下即叫囂震天，Sammi就走向安仔座位方向、竭盡所能的叫安仔不要中計！豈料子華更話有乾坤道：「大家係咪好想安仔同Sammi講，你太瘦喇！咁樣點生BB？」Sammi反駁：「邊個話要生？」子華卻抵死謂：「仲得架！你今日有啲攰，休息完會唔會有啲力同安仔……傾下？我想話俾你知，講少少社會意義；點解大家想你同安仔一齊？因為係童話，係金童玉女，但係又曾經爆過煲，然後破鏡，竟然又能夠重圓！係童話中的童話，所以你哋有社會意義、有社會責任，因為今時今日的香港，缺少好多童話；又所以，如果你兩口子嚮屋企鬧交，如果許志安鬧你，你有權叫安仔收聲！話唔係為我，係為香港，叫安仔買豉油都唔好駁嘴，大局為重！而童話最完美係生個仔，我連你個仔個名都幫你諗好，就叫『勝不許敗』，許志安個仔，許勝不許敗！一家三口一齊就贏晒，許志安、鄭秀文、許勝不許敗！」贏得全場掌聲如雷！

子華叫Sammi不要回水。