蘇永康於6月21同22號喺紅館舉行個唱，噚日喺香港仔宣傳，除一眾好友任賢齊、陳奕迅、張衞健、容祖兒、鄭秀文同草蜢等拍片支持，黃子華更親自撐場。

子華早前出心出力幫蘇永康拍片宣傳，噚日見到好友就話：「今日見你咁正常，上次見你係肥到唔正常。」蘇永康稱減咗十幾二十磅。子華又話：「我係蘇永康個仔嘅契爺，唔係蘇永康契爺，買飛啲人唔好搵我，我自己個騷都冇搞呢啲嘢。」蘇永康多謝子華相助，特意送上三個金人獎，寓意子華獲最佳編劇、男主角同導演獎項。

人多舞台逼爆
問蘇永康會唔會請子華上台？佢話：「佢堅係浪口，承諾過唔做嘉賓，朋友有呢個諗法我唔勉強，佢已經幫我好大忙。」張衞健預告到時踩場，蘇永康話好多朋友承諾到場，但中樂團已有86人，朋友上台都未必許可。子華聽到有86人樂團即話：「86人？即係慈善騷喎，冇錢賺啦。」蘇永康承認今次係開騷以來成本最高。宣傳片由子華做市場策劃，佢自爆超出成本：「條片有budget，用多咗十倍錢，原本我一個，我呢一次唔使錢，跟住幾十人、樂器，幾十個飯盒，大咗十倍唔止，不惜工本。」

蘇永康（右）噚日為個唱宣傳，送上三個金人獎多謝黃子華。

黃子華做市場策劃為蘇永康演唱會拍宣傳片，直認超支。