黃子華與徐子珊昨日為劇集宣傳，當遊戲環節時，子華抱起穿短裙的子珊，一度疑似走光，嚇得子珊一臉驚慌，急按裙腳。子華又笑言要將子珊的人形攬枕放在家中露台，等有周刊影相時舉起，大搞假象緋聞！

黃子華、徐子珊、高海寧、陳敏之等昨日為劇集《My盛Lady》宣傳，子華在台上應要求抱起子珊，穿裙的子珊顯得一臉驚恐，更疑似走光。之後子華、林子善和阮兆祥在劇中組成的組合Super Senior一齊把陳嘉佳（小寶）抱起，子華即Man爆說：「我一個人都得啦！」但當聽到要抱小寶回家照顧一生一世時，即「縮沙」推給子善說：「交畀你，你抱完就攞硬飛躍新人獎。」子華即場唱劇集主題曲時笑說：「係人都知聽我唱歌要收錢㗎！每位100蚊，不過係我畀你哋。」十分搞笑。

40點跪van仔回家
談到劇集今日首播，子華表示心情興奮：「所以我着件魚生師傅衫嚟，希望將套劇新鮮熱辣送畀大家，如果收視好就會着住呢件衫一個月。」對於子珊日前表示如劇集有40點便叫子華「跪回家」，他笑說：「我就着住呢件衫跪喺子珊揸嘅van仔度，等佢送我返屋企，貪佢夠危險。」

問子華對40點收視是否有信心時，他即反問平時通常是幾多點，當得知只有廿多三十點時，他就笑說：「我係冇乜信心，不過絕對有信心維持依家嘅點數。（無綫靠你打仗？）靠擺我上枱就真，我冇乜依靠，呢次證明如果唔得，以後就可以慳番！都係靠子珊穩陣啲。」

人形攬枕惹遐想
問到子珊會否擔心粉絲對她的攬枕有另類幻想時，她說：「成件事好驚，好驚見到自己有個1：1產品出現，唔敢想像。」子華卻想將子珊的攬枕拿回家：「放喺屋企露台，等有周刊嚟影時就舉起！（製造緋聞宣傳劇集？）唔會啦，我追咗子珊2個月都唔成功，唔會再諗！」

昨日是自無綫宣布抵制「壹傳媒」後，首個商場活動，無綫企業傳訊部副總監曾醒明亦特地到場監督運作，以確保執行順利，而保安亦比以往嚴密，記者到場時要拿出記者證及簽到以確實身份。

黃子華與徐子珊攬腰合照，相當煙韌。

子珊被子華「強抱」，惹走光疑雲。

子華、林子善和阮兆祥出盡九牛二虎之力將陳嘉佳抱起。

子華笑言將子珊的公仔放露台，製造緋聞假象。