初五開工大吉！7年冇喺紅館開騷嘅古巨基，今年5月返嚟喇，搵咗好兄弟黃子華拍片幫佢喺Facebook公佈，最勁代言人子華神喺短片度話：「古巨基聽講你5月開演唱會噃，依家已經係2月噃，7年冇開演唱會，忽然之間話要開演唱會，聽講你有隻歌係同我有關噃，你唔好呃我噃，我一定係擘大隻耳仔，等候你演唱會。」

喺FB帖文裏面，基仔只係公佈「五月，紅館見」，#香港站特別版古巨基我們世界巡迴演唱會，網友紛紛留言：「等到頸都長埋！上次睇你仲讀緊中學，而家都已經出嚟做嘢啦，5月紅館見！」、「開啦開啦，終於係香港開啦！」、「基仔好嘢，會唔會係子華唱歌基仔做棟篤笑呀？」、「你下次派台的合唱歌真係同子華合唱呀？」

《蘋果》致電問基仔點解咁勁搵子華神宣佈開騷？佢喺電話風騷表示：「因為佢靚仔吖嘛，我咁緊要嘅一件事，一定要搵個靚仔幫我講，咁當然啦，因為佢當旺呀，佢部電影咁爆票房咁好，我有一件咁重大嘅事，一定要搵佢幫我公佈。」對於網友問同子華係咪有合作？基仔賣關子：「係嘅，我同子華係有一個合作，不過將要喺3月份先可以公布，至於內容係乜嘢呢？依家唔講得住。」問到咁耐冇喺紅館開騷嘅感受？基仔大大聲話：「7年冇返嚟紅館開騷嘅感受就係好痕呀，7年之癢啦，好期待。」

黃子華喺FB代基仔宣佈開騷。