黃子華自從去年8月完成最後一場《金盆啷口》棟篤笑之後，可以話正式「封咪」暫別舞台，不過休息過後，原來子華已經重出江湖，今次不再拎咪，反而就獲好友蘇永康邀請為他6月舉行的演唱會拍攝宣傳短片，蘇永康跟子華老友鬼鬼，囝囝Jazz更是子華的契仔，當然非常幫忙，今次子華自編自導自演，他笑笑口說：「幫忙係因為佢買咗層樓畀我，講明我一直可以住，住到第日個仔大再畀返佢，哈哈。講真我哋真係好朋友，十幾年前喺橫店一齊開工拍戲，日對夜對，我到依家都仲記得有晚係中秋節，佳節得我同佢兩個人孤單度過，兩個人坐喺架黃包車上面賞月傾計，嗰一刻我已經覺得我哋兩個應該喺埋一齊架啦！但係我唔能夠，所以……依家咪當咗佢個仔係我個仔囉！」

蘇永康話年初一帶個仔向契爺拜年時，講開演唱會的事，子華花兩秒就已經度好橋，仲拍心口話幫忙，他說：「條片入面，佢係飾演契爺角色，呢個契爺真係唔話得，唔好話我個仔，連我自己都未見過咁大個富格林金幣，佢就送畀阿仔上契。Jazz兩歲，佢好鐘意同契爺玩。」至於演唱會子華神會不會做嘉賓？子華神話：「我已經發咗誓唔會做任何人演唱會嘉賓架啦！我依家鐘意拍嘢，我講真。（咁如果第日契仔Jazz開演唱會呢？）等佢大個真係唱歌先講啦！」

子華解釋兩人認識於微時，當時認定對方是一世的朋友。

短片中，子華抱B餵奶，十足一個型爸。

住家男VS管弦樂團，好鬼正！