黃子華同佘詩曼繼多年前喺無綫劇集《絕代商驕》合作叫好叫座後，再次合體演出電影《棟篤特工》，並會喺今年賀歲檔期上映，事隔多年再碰頭，兩人有咩感覺？子華先大讚阿佘由頭到腳脫胎換骨：「以前拍劇時佢係姐仔，依家已經係巨星，係一種感覺大家都好認同。」

旁邊笑笑口嘅阿佘一句神回覆：「你仲勁啦！以前係人，依家你係神（男神）呀！」子華就話：「一路以來呢樣都係一個笑話，橫掂依家個社會神多過人，有咩所謂呀！」

今次電影入面子華飾演嘅特工，需要變身多個搞笑造型示人，佢話：「造型多到記唔到，你哋一定要入場睇，先會感覺目不遐及。」子華話自己最喜歡一幕係地府場景：「個景雖然係地府，但感覺好似喺新宿歌舞妓町咁，而且仲要用VR方法呈現。」

戲中另一亮點，係邀請到多位巨星包括鄭秀文、許冠文同楊千嬅等客串演出，係咪全部都由子華碌人情卡搵番嚟？佢話：「原本一路都冇諗過搵巨星，因為其中幕戲份係兩個巨星「瀨嘢」，試問邊有巨星願意嚟「瀨嘢」，點知佢哋真係搵到。」子華話自此之後每日劇組都請到一位巨星嚟客串：「全部都唔係碌我人情咭，但我相信佢哋咁多位係嚟拯救我，所以好多謝佢哋咁多位。」

阿佘同子華接受訪問互笠高帽。

黃子華話最鍾意戲入面一場地府戲份。