黃子華話撐維基嘅港視獲發牌，但何不來一個「黃王」合作？ 兩大橋王，唔驚天地，都泣鬼神吧？其實好耐之前已有網民提出呢樣嘢，而其實，黃子華，係傾過嘅。

今日有報道專訪黃子華，當中亦有談到同港視合作告吹一事。黃子華於訪問中謂:「當時王先生嗰邊的確有人搵過我嘅經理人傾合作，但嗰個人第一句就話其實公司冇咩錢，又講到公司內有幾多幾多問題，結果連餐飯都係經理人埋單，我哋呢邊都未有任何要求，你話點傾落去？」聽到呢度，大致都能想像當日雙方窘迫對坐之景。子華表示，聽講當日同佢經理人接洽嘅呢位港視員工，已經冇做。子華謂：「我唔係要歸咎嗰個人，呢個可能就係命運。其實我決定拍與否，最重要提供拍攝條件，坦白講，拍劇唔會為我帶嚟好大收穫，我冇其他side business，又唔去登台，但我要花好多時間、精神、出動私伙拍嘢，都係想做好件事，俾觀眾睇得開心。」至於何時再拍劇？子華話：「我暫時都睇唔到幾時會。」子華又表示，佢當然好希望王維基攞到牌，但亦為其擔心到製作問題：「王先生有牌的話，亦會發現要做到一齣萬人敬仰嘅劇集，係好困難。我每一次參與（拍劇）都係想好啲，都只係出盡力，我付出百分之二千出嚟，連我殭屍份力都出埋，你話係咪必有保證？我真係唔夠膽講；一個好劇本難度係好高好高，唔係你努力就得。你要得，真係要超乎、超得先得。」