一連35場《前度》舞台劇，噚晚終於曲終人散。完騷後約11點幾，子華、法拉同埋一班工作人員拉隊去銅鑼灣慶功。子華入食肆前接受傳媒訪問，就話忙完舞台劇，過2、3個月就會參與同蕭定一合作嘅電影，理解返個角色，仲會拍吓啲廣告。子華笑住話：「好開心，35場我都用咗洪荒嘅力㗎，都病咗3日，食咗幾日藥。」問佢有冇機會開part 2，子華就耍手擰頭話：「唔會啦！法拉都要返學！」

比子華遲嚟5分鐘嘅法拉，就話自己會留多一個禮拜，拍吓廣告交學費。法拉表示：「放寒假再返嚟，斷斷續續都會返嚟，要揾食嘛！（無綫有冇揾你拍劇？）有搵經理人傾，我冇接觸過，不過我都唔可以接時間太長嘅工作。」

法拉仲講笑話今次返嚟做暑期工要多謝老闆子華，仲話已經夠畀之後嘅學費，子華即刻話係有人投資，唔關佢事。問法拉仲想同子華合作啲乜，佢就話之前合作過拍電影，希望之後再有機會。

順利完成舞台劇，法拉今日喺fb貼咗佢噚晚同子華神謝幕嘅片段，二人喺後台攬到實一實。事後法拉就話自己喊到連假眼睫毛都甩埋，仲話好唔捨得大家㖭！至於子華神就冇法拉咁感性，只喺ig貼咗張台下chok樣相。

完咗騷後， 子華同法拉就去咗做慶功。

子華話會休息一排先再拍戲！

子華話自己用咗洪荒之力完成35場舞台劇！