收視福將黃子華和搞笑能手阮兆祥，近日參演無綫新劇《My盛Lady》，兩男跟陳敏之都有感情戲，劇情交代骨瘦如柴的子華，前晚為送暈倒的敏之入院，抱着110磅的她跑街搶的士，情況狼狽，跑足九次令子華汗流浹背。相對祥仔卻執到支好籌，昨日他雖在炎熱的石澳拍外景，但卻可以吸啜水着敏之，可謂爽到爆。

無綫近日力邀福將黃子華孭飛主演新劇《My盛Lady》，不但搭花旦徐子珊、索腿天后陳敏之，還有爆笑到暈的阮兆祥，有指因為重頭劇《金枝慾孽貳》播映至今，收視和口碑不理想，無綫為救收視，有意將原定明年推出的《My》劇，提早至今年播映。眾演員連日趕戲，祥仔艷福遠勝男主角子華，繼日前在街頭率先咀爆敏之後，昨日祥仔再執到好籌，跟敏之在石澳拍攝接吻戲份，豬腩祥吸啜水着之，但敏之未拍已經笑唔停。

46歲牛一飛來艷福
據知敏之在劇中暗戀子華，並獲對方改造，一洗娘味變身紅爆天后，敏之為測試祥仔的性取向，主動追求他，而墮入愛河的祥仔幻想當年爺爺在沙灘追求嫲嫲的浪漫情節，二人昨日就拍攝這溫馨一幕，他們分別換上六十年代的泳裝，敏之不慎遇溺，祥仔英雄救美，準備為她人工呼吸，怎知敏之突然蘇醒，還主動出招迷魂鎖緊箍啜爆祥仔。其實敏之日前拍該劇已跟祥仔咀過，事隔幾天，兩人再有激咀場面，這次卻升級由街頭跳到沙灘，敏之還熱辣辣換上兩件頭泳衣，僅33吋上圍雖未至波濤「胸」湧，不過加上24吋小蠻腰和一雙43吋長腿，總算有睇頭。

敏之和祥仔拍攝前先行綵排，當祥仔俯身湊近敏之臉頰作勢咀下去試位時，她已忍不住笑了出來，祥仔即教路：「你瞌埋對眼。」拍攝時，敏之聽教閉目，結果這場咀戲順利完成。敏之日前咀祥仔後，已大讚祥仔嘴唇又軟又厚最好咀。敏之的泳裝未見十分性感，她大方自嘲：「我唔係走性感路線，我有腳睇。」祥仔聽後反駁：「有邊個冇腳？」記者追問敏之為何不拋胸？甚有自知之明的她說：「我上面都冇嘢晒。」
泳裝出鏡的敏之前晚是否禁食？她說：「我盡量唔食，呢部劇嘅對手子華太瘦。」祥仔揶揄子華和子珊都厭食，他說：「得我有一嚿六合一肚腩。」敏之也說：「我都有肚腩，呢套劇得我同祥仔係大食組，子華同子珊係細食組。」祥仔前日46歲牛一，他向劇組請假三小時回家，與佘詩曼、錢嘉樂和黃日華等在家開派對，並由祥仔女友親自下廚，祥仔表示其母未有催他結婚生仔。

黃子華抱敏之喪跑
祥仔有艷福連咀敏之兩次，子華前晚卻要在何文田拍攝抱着敏之送院的戲份，徐子珊協助搶的士，紙板身形的子華為遷就鏡頭，抱着110磅的敏之，先後跑了九次，跑到身水身汗，他笑言：「係體能考驗，我夠力嘅，咁啱之前拍咗場戲，仲食咗兩磅蛋糕。」敏之也說：「我都怕佢手抽筋，怕佢手痹。」無綫助理總經理區偉林日前宣佈明年所有劇集要有八成劇本才可開拍，子華說：「有足夠劇本唔代表一定好，有時臨時加插都有新衝擊，有八成劇本當然好，但首要抬高編劇人工先。」

瘦削的子華前晚抱着暈倒的敏之，來回跑了九次。