蘇永康將於6月在紅館開唱，黃子華為老友粉墨登場，自編自導自演拍攝演唱會宣傳短片。今次咁出心出力，子華神笑住話：「因為佢（蘇永康） 買咗間樓畀我，講明我一直可以住，住到第日個仔大再畀返佢！講真我哋真係好朋友，十幾年前喺橫店一齊開工拍戲，日對夜對，我到依家都仲記得有晚係中秋節，大好佳節得我同佢兩個人孤單度過，兩個人坐喺架黃包車上面賞月傾偈，嗰一刻我已經覺得我哋兩個應該喺埋一齊㗎啦！但係我唔能夠，所以……依家咪當咗佢個仔係我個仔囉！」

聽住子華神亂噏無句真，坐旁邊的蘇康笑個不停，說：「其實係我今年要開演唱會，初一帶埋阿仔同佢拜年嗰陣，大家傾開，我話我想拍條片放上社交網站宣傳，咁子華就即刻兩秒鐘度咗條橋畀我，之後我話我唔識搞，佢就拍心口話幫我搞埋，真係好唔話得！非常之多謝佢。條片入面，佢係釋演契爺角色，喺我演唱會期間一力承擔湊仔服務。講開又講，呢個契爺真係唔話得，唔好話我個仔，連我都未見過咁大個富格林金幣，佢就送畀阿仔上契，金幣之外，重有成日送好多玩具。 阿仔就兩歲，開始識得認人，佢唔係咁鍾意男人，見到我班朋友都喊，但係契爺例外喎，佢好鍾意同契爺玩。」假如子華神真的在演唱會期間代湊仔，他放心嗎？蘇康話：「放心，我驚我個仔玩謝個契爺多啲。」

至於會否當演唱會嘉賓？子華神就話：「我已經發咗誓唔會做任何人演唱會嘉賓㗎啦。我依家鍾意拍嘢，我講真。（如果第日契仔Jazz開演唱會呢？）等佢大個真係唱歌先講啦！」

黃子華跟蘇永康老友鬼鬼，更是Jazz契爺，湊仔冇難度。