最近香港實在發生太多太多事，而且大多數都係不可思議嘅怪事。如湯顯明、如碼頭工人抗爭、如政府趕絕露宿者，但美其名係「美化」天橋底喎。

立法會財務委員會，通過撥款1億賑災，令人諗起黃子華當年喺「秋前算帳」棟篤笑嘅金句﹕「中國嘅問題一定唔少得過英國（下略）你真係要理？淨係賑災嘅問題都賑死你。吳剛都透唔到氣，又嚟？」咁子華當然唔係叫大家唔好捐，只係要大家量力而為。依家仲多咗個考量，就係……捐咗嘅錢，用喺邊？有冇監察？

講開子華，佢今日到將軍澳電視廣播城，為文偉鴻監製新劇《My盛Lady》試造型。久未露面嘅子華踢拖上陣，一身街坊裝，似乎又消瘦不少，但佢強調身體絕無問題：「監製都話好擔心我，問我有冇事，我澄清我健康從來都ok，冇問題冇事，我只係keep弗，其實都keep咗好耐，但依然有肚腩，依家130磅都唔係好瘦，只係瘦喺面度。」之不過，同日徐子珊出席另一活動時，都話覺得子華太瘦了，仲話自己都要減肥，希望追得上子華咁話喎。

今日嘅黃子華，同佢08年拍《絕代商驕》（右圖）身形真係爭好遠。

踢拖現身。這就是黃子華。