黃子華一直被指是電影「票房毒藥」，近期憑賀歲片《棟篤特工》大翻身，截至前日本港票房累積約3,751萬元，連同澳門票房將衝上4,000萬，一洗頹氣，實行再由戲院旺到紅館。據知子華今年7月暫定6至22日在紅館舉行棟篤笑，預計開17場，海報上印有兒童不宜，以及「只准18歲以上人士入場觀看」，購票詳情尚未公佈，但子華的粉絲已在網上熱烈討論，開始諗計搶飛。

曾宣佈暫別
雖然官方未正式宣佈開騷，但由於網上已掀撲飛潮，子華為免粉絲受騙，日前在Facebook作出呼籲：「鑑於近日有個別網站流傳能代訂黃子華2018棟篤笑門票，子華及本會為避免有任何人士受騙而招致損失，現特別公告此並非官方授權售票網站。」闊別三年半，子華自14年在紅館開完棟篤笑後，當時宣佈封咪暫別棟篤笑，他感到現時香港太陌生，對前景太悲觀，他曾說：「我諗好多嘢已經笑唔出，唔知點笑，大勢係悲觀。」子華今年再開棟篤笑，觀眾可以再叫「回水」和「除褲」。
子華自90年首次在尖沙嘴文化中心搞棟篤笑系列「娛樂圈血肉史」，將歡樂帶給觀眾，其後差不多隔年都有開騷，10年就殺入紅館，還有世界巡迴開棟篤笑，將正能量散播出去，對上一次是14年在紅館舉行「唔黐線唔正常」，過去28年，全球開過逾350場棟篤笑。

關心香港事
由於棟篤笑的話題貼近香港大事，子華陪港人經歷97回歸、金融風暴、03年沙士及佔中等，每次必有金句發人深省。14年開騷時，講到佔中「扯B論」：「我哋係因為愛而開始呢個運動，無論係政府或者市民，我哋都係因為有啲愛。我希望大家以後更加要諗吓，呢個愛除咗單扯之外，因為如果一邊扯得好實，另一邊唔會話『你唔放，我亦都好愛佢！』我又扯得好實，於是就扯瓜佢。」子華前年和陳法拉在灣仔演藝學院演出舞台劇《前度》代替棟篤笑，同樣一票難求。

【2014年】對上一次開棟篤笑的黃子華，表情及動作多年來不變。

【1990年】黃子華首次在文化中心搞「娛樂圈血肉史」棟篤笑。

黃子華和陳法拉前年合作演出舞台劇《前度》。

《棟篤特工》票房理想，為黃子華一洗票房毒藥之名。