藝人黃子華和佘詩曼到電台宣傳二人主演的新片。子華大爆曾經諗過飛起阿佘：「去到第十稿（劇本）嘅時候，度到有啲場口覺得冇阿佘都得，不過佢係女主角冇計，惟有改劇本。」

事後接受傳媒訪問時，子華又提到這部電影花得最多時間是在劇本上：「因為想拍啲大家從來冇睇過嘅嘢。（今次做埋編劇，片酬有冇收雙份？）冇，唔係講笑，斗零都冇收，仲時不時請大家食飯！」又搞笑大嘆：「點解做人要咁呢，呢件事真係好唔香港，再咁落去做埋呢啲嘢，睇怕我都要有140歲命。」

阿佘本來想邀請子華拍劇，問日後還會否有合作拍劇的機會？阿佘詐晒型話：「我諗冇喇，佢都一嘢就否決咗我。」問阿佘今次可有性感戲？子華即說：「最好唔好喇，喺呢套戲入面。」阿佘說：「呢套戲唔得呀，個角色係保安局局長嚟㗎，好正經嘅！」

好多巨星客串支持
子華又多謝新戲有好多巨星客串支持：「其實唔係好朋友，有啲唔係好熟㗎，但佢哋真係好捱義氣，有楊千嬅、Michael（許冠文）、校長（譚詠麟）每個嚟到都好合作、好受控。（點樣報答佢哋？）冇㗎，記住先，下次有咩要幫忙一定幫。」

二人表示農曆新年會繼續為套戲宣傳同謝票，子華自謙說：「希望有得謝（票）啦！」但據知新片預售場已爆滿且正準備加場，看來今次子華有望一洗「票房毒藥」之名！問子華何時再開棟篤笑騷？子華搞笑說：「等大家睇埋呢套戲再講喇，到時我再講。」

與阿佘在新片擦出火花，子華可一洗票房毒藥之名。

子華笑言曾想過飛起阿佘。