電影《神秘寶藏》今日喺「2015香港影視娛樂博覽」舉行發佈會，黃子華、鄭中基、趙碩之同陳嘉上都有嚟到，但係有份演出嘅陳法拉就冇出席，不過就拍咗條片，片中法拉就話自己會一人分飾兩角，一個就好強、一個就好溫柔，又指道具船真係好大隻，好開心可以演到呢個角色。

喺台上嘅時候，子華就話做一個好風流嘅張保仔，話呢個角色係佢現實嘅理想，因為戲中子華會有一場遇溺嘅戲，佢就大讚自己：「我做遇溺真係做得好好，因為我真係好似就嚟浸死咁。」陳嘉上就喺製作特輯入面，就話為咗架船嘅較果好啲，用咗啲真嘅金箔去做，又話架船完成咗佢30年嘅夢想，而呢隻船仲破咗世界紀錄，係全世界最大嘅道具船。

喺訪問嘅時候，鄭中基就話因為覺得子華做張保仔會比佢好，加上演技紮實，所以搵咗佢做，仲話子華古裝嘅張保仔要吊眉，所以子華就話自己都唔認得自己。問到子華拍呢套戲係唔係好辛苦，佢就話：「係啊，真係好辛苦，我記得自己係由起身天光打到天黑，件衫都冇乾過。」

鄭中基就插嘴話：「佢打到『飛釘』！」子華又話做海盜幾特別，佢話：「因為係黐線嘅海盜，佢哋心態都唔係正常人，好似打完交之後，仲會捉鬼驅魔。」子華又話拍呢套都瘦咗，佢又話：「最後搞笑係有次陳法拉喺船邊練皮鞭，點知我企喺第二邊都被佢打中。」

戲中佢哋兩個都係做海盜，問到怕唔怕俾人拎嚟同Johnny Depp（尊尼特普）比較，子華就話：「我梗係做得好過佢啦，are you kidding me？加上我哋係好癲，佢都仲係正常人，因為張保仔反抗清朝，呢啲唔要命嘅人係好瘋狂，好似頭先話捉鬼驅魔，都係要玩死隻鬼。」

而趙碩之喺戲中就係演陳法拉嘅好朋友，又係酒吧老闆娘，所以要着露腰著同魚網絲襪。講到林欣彤疑似被家暴，佢就話：「我未睇呢個報道，希望佢冇事啦，做女仔要知自己想要咩，咁係好唔健康，要諗下應唔應該分開，應該兩個人係互相愛鍚對方，而唔係打對方。」

子華自誇演得好過Johnny Depp。