黃子華告別棟篤笑《金盆浪口》今日有信用卡優先訂票，大批網民在社交平台投訴網站死Server、電話打唔通，更有虛假的售票網Whatsapp訊息流傳。子華今晚在面書上載兩段短片討論黃牛飛，他提到有網民呻買唔到飛，勞氣稱自己及團隊都冇，「黃牛」竟然因有內部渠道而有飛。

子華表示：「我覺得係咪要報警？或者報畀ICAC聽呢？內部有飛係點得嚟？問題係我哋冇證據、線索去舉報。不過黃牛又唔係犯法咁喎，所以每個演唱會都有同一個問題。我喺度正式同政府提出係時候正視問題，好多時我同人講，呢啲係奢侈品，但係依家到民間每一次受歡迎嘅演唱會都係咁，普通文娛活動都受到剝削時，有關部門係咪應該正視？」

提到有人問子華是否「又食又拎」，賣正價飛兼做黃牛？子華表示團隊委屈又喊晒口，他睇到這些評論都好激動，要冷靜下來。「各位我冇咁嘅本事，一個表演者花咗好多精神去預備。每日臨瞓之前我就諗緊嗰句嘢點講呢？未起身一擘大眼、半夢半醒又係諗緊嗰句嘢點講呢？我有句嘢諗咗成個月都唔知應該係點樣講，大家都好辛苦去準備一個表演，然後就係一啲完全唔需要去付出嘅人，去賣一倍、兩倍、三四五六七倍嘅價錢，一啲好長期支持你嘅fans要去承受呢啲價錢。我一路都好接受世界係唔完美，但係咁係太過不完美，係太過離譜。」

黃子華斥黃牛問題太離譜，呼籲政府正視問題。