現年54歲、前樂隊幕後玩家成員羅金榮（Wing）與黃子華相識20多年，雖然Wing入行多年星途未如理想，不過他一直堅持不放棄，獲黃子華默默支持，Wing曾經以「前世唔知係咪親兄弟」來形容這位「黃金兄弟」。Wing與子華這對好兄弟前晚齊齊到《蘋果》大樓，現身「娛果」特備節目「黃金唱．爆你」，子華神直言現身只為了老友羅金榮。

嘆音樂路難行
「金盆浪口」後的子華再開金口，令在場圍觀的壹傳媒同事個個拍掌叫好，對於Wing在97年自資出唱片，子華笑指Wing最擅長「自資」，但Wing就說沒辦法，因為沒有唱片公司欣賞。子華即說：「據我所知，香港第一個我認為係真正音樂人去busking嘅係羅金榮，當時佢同我講去女人街街頭表演，我覺得咁快要乞食？當年女人街好多時有人掟鏹水，Wing有一日問我知唔知旺角點解咁多人淋鏹水，差人都捉唔到，因為佢哋係想掟我！所以佢當年係冒住生命危險去busking！」Wing讚子華對音樂上的認知：「大家以為子華只做棟篤笑同做戲叻，其實佢喺音樂方面嘅認知，比好多音樂人還高。」

Wing唱完《海闊天空》後，子華有感而發地說：「我識咗羅金榮20幾年，我都唔明佢點解唔背棄佢嘅理想，因為實在太難行，除咗busking被人掟兩蚊，冇人搵佢出碟，辛苦賺嘅錢又唔夠請樂隊，自己一手一腳整晒出嚟出，又冇乜人理，只係想搵食啫，唔係賺大錢。唔係黃子華睇住你，請羅金榮做好多騷嘅製作嘢，我都真係唔知你去咗邊度。」子華直言感到心噏：「有一次羅金榮去參加中國啲音樂比賽，佢同我講，經過三番四次，上咗內地好多次，終於爭取到一個機會。同李克勤一齊唱《紅日》，獲得唱兩句嘅機會，佢仲好高興send畀我話我知，我睇到只係覺得好艱辛。」

希望對方成功
說罷子華又向Wing說對不起，指他可能說了一些不應該說的事，Wing笑說好多人都知，子華即說：「克勤都知啦！我當時睇到克勤直頭係想話：『畀佢上嚟唱喇』我有啲feel到，因為克勤都識羅金榮，只係喺嗰個場合，佢只係唱得兩句。」子華最後更自爆曾經叫過Wing轉行：「佢唱呢兩首歌，令我諗起有一日，同並冇明天嘅羅金榮一齊行街，唔係辦法，自己作曲作詞呢啲真係好難搞，喺上年佢又同我講會出碟，又會自己作歌，於是冇辦法喇，其實我已經叫過佢幾次揸的士，唔係講笑，因為為佢嘅生計擔心，最後佢又搵到錢出碟，都好希望佢成功。」

黃子華前晚到《蘋果》大樓，現身「娛果」特備節目《黃金唱．爆你》。

子華與羅金榮（右）在節目中開金口，大唱多首金曲。