黃子華終於返嚟喇！子華今日同徐子珊、細細粒陳嘉佳喺烏溪沙為無綫新劇《My盛Lady》首日開工，好鬼瘦嘅子華精神奕奕地開工，佢接受訪問時話：「我之前每日都用成個鐘做運動㗎。」證明子華都好緊張個劇，講到佢新劇角色，子華話：「角色係令人討厭嘅人，但相信觀眾會覺得我好可愛，我係專幫啲盛女搵好歸宿，唔收錢嘅『人生教練』，細細粒係我第一個幫嘅人。」

子華自己喺劇嘅感情線，原來除咗子珊外，仲有個「真命女友」，但依家佢都未知係邊個。講到佢身形咁瘦咗，子華抗議：「全無綫啲花旦都咁瘦啦！」但子珊話怕子華抱佢唔起？子華話：「放心，我拎起件衫有二頭肌，好驚嚇，瘦骨仙都有肚腩仔，我係小肥仔。」問到佢係咪搵患病嘅張達明客串，子華話：「上次純傾偈冇講工作，等佢身體完全康復先啦，我知佢有幫幕後做嘢，充滿精力。」

首次同子華合作嘅子珊話：「同子華對戲好好玩，比想像中輕鬆。」子珊都話為咗弗啲嚟開工，之前都狂做運動跑步，雖然子珊話自己瘦咗，但拍埋子華度都仲算係肥。而細細粒因為同子華合作，緊張到前晚瞓唔著，佢話第一次有咁多戲份，所以做咗好多功課，細細粒話遲啲佢喺另一套劇《貓屎先生》入面會同王浩信拍拖，仲又尷尬、又冧咁話可能有咀嘴戲添。

子華好鬼瘦。

肥瘦孖寶，相映成趣。

咩事子珊？

Wow~~~