「世界一日唔和平，我好難兒女私情。」一聽到這啜核、押韻的金句，就知道子華神返嚟喇！黃子華棟篤笑的功力毋庸置疑，每次開騷門票定必被秒殺，電視劇亦同樣收視口碑俱佳，劇中金句更不斷被人翻Loop。不過他在電影方面一直被指是「票房毒藥」，今個農曆年黃子華再闖影圈，與電視劇《絕代商驕》中的黃金拍檔佘詩曼再度合作，聯手打造賀歲電影《棟篤特工》，且看這對歡喜冤家合力「發功」，能否打破票房宿命！

黃子華的搞笑實力早已被譽為神級，無論是棟篤笑、電視劇，都會連環爆出富哲理性的金句，16年踩過界與陳法拉合演舞台劇《前度》展現神級演技，加場再加場後依然一票難求，其智慧與幽默被人尊稱「子華神」。不過神也有其弱點，就是電影發展。子華曾主演的電影《嚦咕嚦咕對對碰》、《男歌女唱》等都票房慘淡，02年他自編自導自演《一蚊雞保鑣》，最後更只收約11萬票房，「票房毒藥」封號自此與他掛鈎。今次再勇闖影圈，他坦言千萬不要「挑戰個天」，「票房同人嘅命運一樣，上天畀你就畀你，千祈唔好話『我冇理由冇嘅』，咁就瀨嘢喇！」

歡喜冤家
10年前，黃子華與佘詩曼於無綫劇《絕代商驕》中的熒幕情侶形象深入民心，今次兩人再度合作，原來是阿佘主動提出的，她笑說：「我識佢嗰時仲係人，但後尾變咗神喎，咁點可以唔同神合作吓呀？」子華立即反擊：「你唔可以同大家講，你上次同我合作好愉快，每日都如沐春風㗎咩？我依家叫阿佘做Sexyman，咁佢親自話搵我合作都係一個Honour。」
要促成黃金組合的合作，少不了等待的過程，而一等就是兩年了。為求完美，子華與編劇組度了足足10稿的劇本，訪問期間阿佘也不斷肯定子華的努力：「之前第一、二稿我有睇，我覺得都幾搞笑㗎喇，跟住睇睇吓又嚟（新劇本），我就覺得唔對路喎，同佢講『你搞掂先畀我睇啦』，都估唔到最後搞到第10稿。」

女神崩壞？
這部嘔心瀝血之作以特工為題材，講述子華飾演的頂尖特工Mr. Chan多年前因無心之失被停職，更對阿佘飾演的女警余香欠下情債，廿年後余香晉升為保安局局長，逼於無奈下委託Mr. Chan破案的故事。雖是喜劇，但拍攝過程及角色都殊不簡單，連從影多年的阿佘也有新嘗試，她笑言：「我今次係保安局局長，權力好大，又畀人呃咗，懷恨在心，因愛成恨。咁我就設計咗自己講嘢成日藐嘴藐舌，我覺得都幾樣衰㗎！」此時子華不忘「補一刀」：「總之你未見過咁樣衰嘅阿佘！因為佢嘅心理比我呢個初戀摧殘咗，由佢最初靚靚女女，然後扭曲咗個心理，連個面型都扭曲埋，咁佢真係做得好樣衰！」

而子華的挑戰也不少，他大爆有場戲要在水中倒吊，令他首次體驗到何謂遇溺，「水底倒吊唔係最恐怖，係綁晒手腳冇得郁，再倒吊擺落去，真係好驚。嗰次真係我呢世人第一次知道咩叫遇溺！」而在戲中不斷趕絕他的阿佘也心痛地說：「嗰場真係唯一一場我唔忍心摑佢。」

群星打救
既然《棟篤特工》是賀歲電影，自然少不了「群星拱照」，今次也碌了不少人情卡，如譚詠麟、許冠文、鄭秀文等，子華直言當初想也不敢想邀請到這麼多巨星坐鎮，「監製好勇敢話搵許冠文、譚詠麟，我話『你都黐線嘅！』點知又畀佢搵到返嚟，佢真係膽大包天！而嗰啲朋友又肯嚟，每一個嚟嘅人應該都係抱住一個拯救中咗毒嘅人、『睇下呢劑藥醫唔醫到你』嘅心態，所以我好感激，之後我會逐個拍條片多謝佢哋。」
子華與阿佘合力發功衝擊新年票房，讓不少觀眾引頸以待，他們都認為今次比電視劇更好玩過癮，子華更有一些新發現：「阿佘嘅彈性比大家想像中大，一啲想像唔到嘅角色佢都應該可以做，包括一啲大家認為比較藝術性嘅角色。」阿佘立即回話：「下次再寫多個⋯⋯」話口未完，子華已馬上「戴返個頭盔」：「呢層票房上呢⋯⋯要有實力嘅人做先得，我要過到呢關先得。」觀乎觀眾近年對子華神的熱情，再看阿佘最近在電視劇《誇世代》的驚喜現身，令網民紛紛大呼掛念她的幕前演出，黃金組合加上農曆新年的電影黃金檔期，呢鋪仲唔掂？

黃子華與佘詩曼於劇集《絕代商驕》飾演歡喜冤家麥提爽與林淼淼，形象深入民心。

電影《棟篤特工》海報以1981年《鐵金剛勇破海龍幫》為設計概念，向占士邦電影致敬。

02年黃子華自編自導自演的電影《一蚊雞保鑣》，即使找來郭羨妮擔任女主角，也無助票房。

黃子華戴上這特製的VR裝置後，變成了鬥雞眼，佘詩曼笑稱對這個造型很深刻：「我好想打佢！」