噚日係棟篤男神黃子華同陳法拉嘅舞台劇《前度》首日公演，唔少圈中人都爭住去一睹男神同法拉互相鬥戲。

不時喺棟篤笑中以誇張笑料反諷社會嘅子華，雖然唔再搞棟篤笑。今次呢部舞台劇，雖然以情愛作為主線，不過劇中就安排唔少戲大講基層之苦，又會以老闆（子華）角度去睇基層同社會，有唔少人睇完都畀Like，覺得劇本同三位主角都做得相當好。子華同法拉更係喺劇中互相爆粗，話喊就喊，相當入戲。

完騷後，一班子華嘅粉絲於劇場外等侯，子華見粉絲都笑笑口，不過就唔出得聲，佢仲舉起牌話：「養喉護聲，不便說話。」個牌仲細細隻字話係中醫嘅命令，認真幽默。