蘇永康（阿公）將於6月21及22日假紅館舉行演唱會，今日在香港仔出席宣傳活動，一眾好友拍片支持，包括任賢齊、陳奕迅（Eason）、張衞健（Dicky）、容祖兒、鄭秀文、草蜢等，Eason身為阿公兒子Jazz的契爺，表示屆時會指鼻哥入場，而好友Dicky稱阿公是情歌王子，以急口令大力催谷阿公個唱合乎港人指標最抵看，並預告有可能隆重登場。

阿公表示眾多好友爭相幫忙，但礙於與中樂團合作，既有西樂手，一共一百多人合奏，難以即興加插嘉賓，叫Eason可以在後台幫手湊仔，並笑說：「若Eason神經刀要衝上嚟玩《龍舌蘭》我接唔到。嘉賓方面係會有嘅，將會係未喺紅館合作過人。」阿公較早前瘦了，他表示初八開始做運動，被指可以努力超越安仔，阿公笑說：「唔敢同佢爭一日長短，佢排腹肌貼上去一樣，百年歸老都仲喺度。」

早前男神黃子華出心出力助阿公拍片宣傳，今日亦專登撐場，見到阿公即說：「今日見你咁正常，上次見你係肥到唔正常。」阿公表示已減去十多二十磅，子華直指自己是衰多口自薦幫阿公拍片，並笑說：「我唔知佢減咗10幾20磅，唔係片中會叫佢赤身露體出現。」阿公即說：「咁即係趕客。」子華特意澄清說：「我係蘇永康個仔嘅契爺，唔係蘇永康契爺，買飛啲人唔好搵我，我自己個騷都冇搞呢啲嘢。」阿公多謝子華拔刀相助，為報答好友，特意送上3個金人獎給子華，寓意獲得最佳編劇、男主角、導演獎項，阿公說：「好快金像獎唔使做司儀，可以上去攞獎。」

屆時子華會否上台？阿公說：「佢堅係『浪口』，但冇話唔拍嘢，承諾過唔做嘉賓，朋友有呢個諗法我唔勉強，佢已經幫我好大忙。」並表示會高唱子華電視劇《男親女愛》主題曲《藍天》。問到子華有否替阿公演唱會作籌備？他說：「我冇資格喎。」而阿公說：「流程已諗好，每次演唱會都有自己想法編排。」

另一好友Dicky預告踩場，阿公說：「好多朋友話嚟支持，但中樂團已有86人，最難係樂譜，啲朋友想上嚟都未必許可。」子華一聽到有86人樂團即替阿公打算盤：「86人？即係慈善騷喎，冇錢賺啦！」阿公指今次個唱是歷年開騷最高成本。

為籌備個唱，阿公十分忙碌，但每朝起床也不忘和囝囝Jazz見面玩樂。早前阿公兩夫妻帶同兒子去學校面試，今日有消息，但他未肯透露情況，只肯說：「邊有家長會見得一、兩間，畀啲空間我哋。」

子華有大製作在身，屆時又會否預埋阿公？他說：「遲一步先算，做得成先啦。」阿公今次片段由子華幫手做巿場策劃，子華爆超出成本：「條片有budget， 用多咗10倍錢，原本我一個，我呢一次唔使錢，跟住幾十人嘅樂器，幾十個飯盒，大咗10倍唔止，不惜工本做個騷。」子華叫阿公考慮做電影老闆，十分歡迎。

子華神再撐老友。

黃子華笑言叫人不要找他代購門票。