歌手蘇永康（阿公）相隔七、八年後將於6月21及22日再踏紅館，好友兼兒子契爺黃子華為了慶賀阿公開騷，日前自編自導自演拍攝演唱會宣傳短片。談到如此出心出力，子華笑言：「咩原因咁幫忙？因為佢買咗間樓畀我，講明我一直可以住，住到第日個仔大再畀番佢。哈哈！講真，我哋真係好朋友，十幾年前喺橫店一齊開工拍戲，日對夜對，我到依家都重記得有晚係中秋節，大好佳節得我同佢兩個人孤單度過，兩個人坐喺架黃包車上面賞月傾偈，嗰一刻我已經覺得我哋兩個應該喺埋一齊㗎喇！但我唔能夠，所以…依家咪當咗佢個仔係我個仔囉！」

聽住子華神亂噏似冇句真，旁邊的阿公笑不停，阿公說：「初一帶埋阿仔同佢拜年嗰陣，大家傾開，我話我想拍條片放上社交網宣傳，咁子華就即刻兩秒鐘諗左條橋畀我，之後我話我唔識搞，佢就拍心口話幫我搞埋，真係好唔話得，非常多謝佢！條片入面，佢飾演契爺角色，喺我演唱會期間一力承擔湊仔服務。講開又講，呢個契爺真係唔話得，唔好話我個仔，連我自己都未見過咁大個富格林金幣，佢就送畀阿仔上契。除咗金幣之外，佢仲成日送好多玩具。阿仔就嚟兩歲，開始識得認人，佢唔係咁鐘意男人，見到我班朋友都喊，但係呢個契爺例外喎！佢好鐘意同契爺玩。」

問到子華如果在演唱會期間真的代佢湊仔，會否放心？阿公就話：「放心！我驚我個仔玩謝契爺多啲。」問到子華會否擔任演唱會嘉賓？子華說：「我已經發咗誓，唔會做任何人演唱會嘉賓㗎喇！我依家鐘意拍嘢，我講真。（咁如果第日契仔Jazz開演唱會呢？）等佢大個真係唱歌先講啦！」

真．老友！

黃子華喺片中發揮搞笑本色。

仲飲埋奶奶！

黃子華做湊仔公。

蘇永康、黃子華老友鬼鬼。