由黃子華、陳法拉首次合作演出之舞台劇《前度》，今晚開始假座香港演藝學院開鑼，舉行總共35場。

頭場喺8點06分準時開場，第一幕主要由陳法拉同飾演子華囝囝嘅劉俊謙做對手戲，場戲講劉俊謙要求法拉幫手搵番老竇，因為子華最近變得蠱蠱怪怪，之後就慢慢講番以往嘅事。不過法拉喺呢一幕冇乜發揮，悶位較多，反而笑位去晒劉俊謙到，成功引到觀眾發笑。

子華要到第二幕先出場，子華一出場帶番起啲觀眾反應，對白啜核似足棟篤笑，唔少觀眾都睇到拍晒手掌。第二幕講番子華同法拉嘅過去，由否定感情變咗表白及和好。

頭兩幕子華表現超卓，極速入戲，就算長對白都有感情，要喊會即喊。反而法拉初段未熱身，動作生硬食螺絲，咬字仲唔正。