子華神今個月喺紅館開最後一個棟篤笑《金盆浪口》，每一晚都會有圈中好友嚟到睇騷，子華神仲會專登講一段嘢多謝佢哋，而噚晚就子華神就多謝修哥（胡楓），仲爆出原來係紅館開棟篤笑係同修哥有關。

子華神話：「唔係因為修哥，我未必會嚟紅館，係因為我同修哥喺TVB一齊拍戲，喺嗰條冇人嘅走廊，修哥自己運動緊，修哥廿四小時都好似晨運緊咁，佢今日好畀面喇，坐足咁耐。修哥好奇怪，我識佢咁耐，佢未同我講過一句認真說話，佢嗰晚同我講咗兩句認真說話，佢話：『子華，你唔好剩係做伊館，要做紅館。』唔知大家明唔明，其實修哥冇必要為我諗，呢句唔係就咁講得出嘅說話，所以我好多謝修哥，呢個係我嚟到紅館嘅原因。」多謝完之後，修哥仲向子華飛吻。

子華仲講到修哥仲有另一句認真說話：「佢有一次同我講：『子華，趁後生，做多啲嘢。』大家可以想像到我幾懶，邊有人好似我咁，幾年先拍一套劇，拍完又冇其他嘢做，幾年先開一場棟篤笑，好似成世人做得幾樣嘢，依家仲話『浪』口，但修哥，我應該會仲做嘢，不過未諗到做咩，但我會聽你講嘅。」

點諗到原來紅館開騷同修哥有關

子華仲貼咗喺化妝室塊鏡倒數場次嘅相

修哥送飛吻畀子華