阮兆祥、蔡一智噚日現身，撐場睇完子華同法拉嘅舞台劇《前度》。阮兆祥話：「一啲都冇失望，仲好有驚喜，冇諗過會有粗口；不過，認同某啲部份加咗粗口會更加突出人物性格同情緒。」據知，嗰一段劇情講到男人偷食以及上一代同下一代嘅矛盾。

問到佢哋睇完之後有冇咩啟發？蔡一智覺得：「好驚訝佢哋好似一家人咁，個小三同佢哋嘅關係好微妙，竟然可以親密到咁！」跟住講笑問祥仔會唔會同個工人發生咁嘅關係？祥仔冇理佢淨係話覺得個劇本好緊扣，子華擺咗好多自己嘅功課落去，同埋好帶動到觀眾情緒，又覺得劇本改編後好地道好貼地。

祥仔最深刻一段係：「子華講到自己不停犯錯，承諾唔會俾自己再犯錯，希望法拉可以返嚟。而且當時法拉只係得內心戲冇對白，但係覺得呢個係最亮點嘅地方。」佢仲覺得法拉喺美國返嚟之後令人有耳目一新，好生活化嘅感覺。

問後問到佢哋鍾意子華做舞台劇定棟篤笑多啲？祥仔就話：「子華做乜都鍾意㗎啦，佢係偶像嚟㗎嘛！簡直就係睇佢表演一樣。」蔡一智就話呢個係子華3.0。