一個藝人應唔應該關心政治，黃子華就認為係個人選擇，但佢覺得好多人要求藝人表態係一個嘅過份做法，佢話：「喺一個自由、容忍、包容社會唔應該咁做，有啲人表態等於冇咗份工，唔應該逼人表態，咁咪同中世紀嗰啲你係咪信教，唔信就捉去燒嘅一樣？特別逼一啲藝人表態，喺香港搵唔到食下個月冇租交點算，但若佢自己表態，大家同意與否佢都會為自己負責。我哋冇辦法唔承認香港大勢係咁，以前一齊工作嘅人，依家好多人收入來自中國，入唔到中國市場可能要轉做生意、搬運、剪頭髮，因香港容納唔到，香港電影有幾多人可以維生？正正因為條氣唔順，大家要求社會時亦要對自己有要求。」

政治生活化，社會怨氣大，藝人都唔可以倖免被要求表態，子華笑話：「喺呢個社會冇漏網之魚啦！喺中醫立場，係條氣唔順，成個社會都係，一個人條氣唔順，做乜嘢就算係睇任何電視台、電台或者睇樓，樣樣都頂住，一日條氣唔順，社會就會越來越細微都睇唔過眼，其實條氣唔順好簡單啫，執一劑藥，『普』伏苓加『選』七粉，五碗水煮埋一匙派嚟食，即係要有好公平公正嘅普選，如果唔係，條氣唔順就冇嘢傾得埋，當然食咗唔係能醫百病，但起碼順咗條氣先，條氣唔順好大問題㗎。」

黃子華認為如果條氣唔順，好易處理，執一劑藥，『普』伏苓加『選』七粉，五碗水煮埋一匙派嚟食。

果然係子華，講政治都不忙幽默一下。

子華仲話普選唔係解決所有問題，但條氣會順。

講到政治立場，子華認為唔應該迫藝人表態。