《樹大招風》，說的是三個大賊在香港主權移交前，發生的故事。

黃子華新片，說的是一個來自香港的英國特工，在97後身份被遺忘的故事。

7月1日將與陳法拉演出舞台劇的黃子華，活於上「梁」不正下「梁」歪的香港，實在笑不出，所以，棟篤笑，不搞了，改為演舞台劇。舞台劇完後，子華小休兩個月，即又開工拍新戲，女主角是曾合作劇集《絕代商驕》的佘詩曼。留意番，係百分百純港產片，唔係合拍片！

如前所述，黃子華飾演一個被前宗主國——英國遺忘的特工，有點似《國產凌凌漆》的周星馳，佘詩曼則是飾演坐完監的黑社會頭子的女人，簡稱「阿嫂」。
新片叫《棟篤特工》，搞笑得嚟又有愛情元素同偵探片味道。杜sir副導謝夫執導，黃子華身兼主角及編劇。故事係講黃子華97年之前為英國做特工，點知事頭婆皇冠頭一甩，子華隨之「失去身份」，成為孤兒仔，阿媽（英國）唔要佢……

（睇到呢度，是否難掩心中狂喜？子華神終於講番佢最拿手嘅政治！金句即時彈出：「香港回歸中國，就好似阿媽標個仔參，邊個俾贖金？依家香港嘅問題，係婆媳糾紛，所謂婆媳糾紛，係種必然瀨嘢嘅關係……」）

返嚟先返嚟先，子華神新片嘅故事情節未講完㗎。

頭先講到子華神呢個俾英國阿媽遺棄嘅特工，無依無靠惟有靠自己，開咗間「人口問題處理中心」——即係私家偵探社。子華神係一個善良嘅私家偵探，唔想教人離婚，反而想幫人調解糾紛和好如初咁樣。直至有一日，黑社會大佬個老婆——佘詩曼坐完監出嚟，搵子華晦氣。原來阿佘十年前搵過子華神幫佢搵老公，搵咗十年都搵唔到，咁梗係要找佢晦氣啦。

未完㗎，戲肉，依家先到。有一個後生仔，發明咗一隻「真性情藥」，食完後真性情表露無遺，例如顧家好男人突然獸性盡現搞人老婆咁啦……子華神就同阿佘聯手調查呢單嘢，想刮個靚仔出嚟研究解藥。正當佢哋以為成功打到大佬之際，先至發現背地裡原來有更大陰謀——佢哋發現，原來好多行為瘋狂嘅人，根本都冇食呢隻「真性情藥」㗎…

同《絕代商驕》一樣，子華神同阿佘今次都有輕愛情線，劇情亦有幾分似子華神聲演嘅電影《優獸大都會》，兔仔同狐狸拍檔調查肉食動物點解忽然狂性大發，原來又係俾人餵藥。大橋難免會撞，反而好想睇下黃子華點樣演繹呢種「必然瀨嘢嘅關係」呢！