黃子華、佘詩曼、張建聲同女朋友陳嘉莉、C君、趙永洪年三十晚去到旺角朗豪坊戲院為新戲《棟篤特工》謝票，子華同阿佘一早就進入戲院神秘同觀眾睇戲，當進行謝票時子華就問啲觀眾你哋係咪真係俾錢入場睇㗎？跟住觀眾玩嘢大嗌﹕「回水」！

子華同阿佘分別同屋企人食完飯趕到戲院，佢哋話以為今日會好塞車，點知交通出奇暢順，一齊都早到咗，於是入戲院直擊觀眾反應，見到觀眾好開心。電影前日優先場收270萬，噚日正式上畫收250萬，共超過500萬票房。子華話：「我唔可以唔滿意，我依家拍電影就好似新仔咁，阿佘就有啲經驗，有咁嘅成績已經係幾好，係一個起步，希望大家多多支持。」阿佘即追問子華會唔會開續集，子華都係嗰句，睇咗起步先。

子華之前拍落電影成績都強差人意，被冠「票房毒藥」稱號，今次終於有啲成績，可以甩名，子華話：「正如我所講最開心係票房，依家啲觀眾好識睇戲，知道呢一套電影唔單只係喜劇，唔係胡鬧，係認真嘅喜劇，我都好開心。」覺唔覺得係阿佘旺場？子華話：「唔使講啦，我哋做盡一切都要留低佢，開續集都要睇佢。」阿佘話如果開到係一個榮幸。

睇埋今日票房，截至今晚10時20分，香港票房暫收418.6萬，連到前日同噚日嘅票房，《棟篤特工》已經穩收逾900萬，如果加埋其他地方票房，好大機會已經超過1,000萬，難怪官方都出圖，話《棟篤特工》票房破千萬，咁又真係幾值得高興嘅。

黃子華甩「票房毒藥」之名，但觀眾仍玩嘢嗌﹕「回水」！

子華話阿佘係福將，如開續集一定預對方。