今日杜德偉就為咗嚟緊嘅演唱會排舞，佢就話收到一條黃子華嘅錄音，係子華私下畀佢嘅祝福，佢仲分享咗條錄音畀大家聽。

子華就話：「你好啊！我係黃子華啊，好多年冇見喇，我好戥你（杜德偉）好開心，喺紅館開演唱會，另外我更加開心呢，就係你同我都係屬於美魔男，即係你就話啫，估唔到我都係。所以呢，我唔知你點keep，因為我主要係靠食蘿蔔，同埋靠金醫生，即係我五官係要靠五個醫生去照顧，包括係金醫生、木醫生、水醫生、火醫生同埋土醫生。所以都keep得唔錯，我都覺得你keep得好好，我唔知你有冇搵邊個醫生呢。」

子華續道：「嗰日我同醫生講：『我覺得除咗塊面呢，個屁股都可以有肉啲。』咁佢就拎啲模特兒嘅相畀我睇，你估佢拎邊個張相我睇？佢拎你張相我睇，杜德偉個股形又真係好正喎，咁我就叫佢整啦，但佢就話唔夠膠喺度，做唔到嗰個形，我話：『有冇搞錯，杜德偉整到嗰個形，點解我唔得？』因為你係真，咁多年個形都咁正，到底你係唔係真？」聽完錄音，杜德偉仲搞咗個好爛嘅爛gag話：「好多人練胸肌難，其實練『股巨肌』先係最難。」

杜德偉又猛話好開心，因為佢本身都好鍾意子華，問到佢子華會唔會去睇佢嘅演唱會，佢就話應該唔會，因為子華就嚟到開騷，所以依家要閉關。

至於舊愛吳君如會唔會做表演嘉賓，杜德偉話唔會，不過會嚟睇。咁到時有咩嘉賓？佢就話要保持神秘。講到老婆大人僧會否上台？佢就話：「我老婆又唔係袁詠儀，所以都會做我幕後嘅女人。」

黃子華私下畀咗條錄音杜德偉。

黃子華話自己同杜德偉都係美魔男。