好喇，黃子華講完笑，咁跟住就係……繼續講笑，仲同Sammi講：「你真係應該學下我，有人嗌唔使理佢哋！好幼稚呀、回水呀嗰啲……我同大家講，我上舞台咁耐，我最驚係今日，呢個時刻。因為大家唔好睇我咁奔放，其實我係唔識得鄭秀文㗎！」全場又大笑拍爛手掌。

子華道：「講真，我見過鄭秀文一日㗎咋！」Sammi奇道：「係咩？」子華謂：「係呀，你記唔記得，我哋曾經拍過一套戲，你記唔記得，我首先講我喺戲裡面，我做你老公吖，係咪？你記得係咪？雖然離咗婚。你記唔記得你喺戲裡面同我講啲乜？」Sammi即謂：「梗係唔記得啦！」嗰部戲，就係《失戀急讓》。

子華聞言反應極大：「唔記得？一句都唔記得？我記唔記得同你講過乜嘢？唔記得。你話我哋有幾熟呢？拿，拍咗一日戲吖，你唔拍戲嗰陣時，我哋又講咗啲嘢㗎喎，你記唔記得我講咩？」Sammi就話：「記得！講書，同埋講減肥嘅。」

子華繼續講：「一日，咁佢就講，早晨，然後我同佢講：『食咗飯未呀？』係咁上下喇，梗係唔係啦，係！我問你睇書…」此時Sammi笑出嚟，又走音，子華就話：「你小心把聲呀吓！佢同我講，本書好犀利，鄭秀文嘅另一面，佢識我嗰日，佢問我：『子華你有冇睇過十九世紀俄國大文豪陀思妥耶夫斯基嘅《罪與罰》呀？』係咪？然後佢就話：『我唔明呀！』跟住我就唔想睬佢喇，因為我係冇睇過㗎，我哋嘅對話就終止咗喇，你睇吓我哋嘅關係咁就完咗喇。」

係咪所有人都以為子華神乜書都睇過晒…

子華同Sammi喺14年電影《失戀急讓》合作。