棟篤笑始祖黃子華繼被封為「網絡男神」後，再獲封「美魔男」，獲讚年逾五十仍保養得宜，與方中信及單立文等齊齊入選，對此子華出席活動時笑言不敢當：「佢哋人又型，車又型，我唔係。（覺得自己型喺邊？）我唔覺得自己型呀！（爭啲咩？）可能爭啲錢，咁唔係個個人都要型嘅，有好多不同類型，呢個世界先精彩。（平時點保養？）零！（天生麗質？）我都想做吓facial，我未試過。（叫女友幫你？）唔同嘅！出面好大力幫你捽，黑頭、白頭、黃頭都唧晒出嚟。」

活動上子華獲頒慈善之星，他表示身邊有不少朋友比他更有善心，不時捐錢建學校，而他則義助「惜食堂」拍片，宣傳愛惜食物的訊息，以及助養了十位小朋友，但他表示未曾見面，因自認心靈脆弱，怕屆時會喊。

子華一身潮Look出席活動。