蘇永康（阿公）今年6月21和22日假紅館舉行個人演唱會，為賀阿公開騷，黃子華粉墨登場，自編自導自演，幫忙阿公拍攝演唱會宣傳短片，夠晒老友。子華笑言如此大力支持，全因收了阿公送的物業，可以住到契仔、阿公囝囝Jazz長大後才歸還。

阿公笑說：「其實係我今年要開演唱會，初一帶埋阿仔同佢（黃子華）拜年嗰陣，大家傾開，我話我想拍條片放上社交網站宣傳，咁子華就即刻兩秒鐘度咗條橋畀我，之後我話我唔識搞，佢就拍心口話幫我搞埋，真係好唔話得！非常多謝佢！條片入面，佢係演繹契爺角色，喺我演唱會期間一力承擔湊仔服務。講開又講，呢個契爺真係唔話得，唔好話我個仔，連我自己都未見過咁大個富格林金幣，佢就送畀阿仔上契，金幣之外，仲有成日送好多玩具。 阿仔就兩歲，開始識得認人，佢唔係咁鍾意男人，見到我班朋友都喊，但係契爺例外喎，佢好鍾意同契爺玩。」問到阿公，假如子華真的肯在演唱會期間代佢湊仔，佢放唔放心畀個仔佢湊？阿公話： 「放心，我驚我個仔玩謝個契爺多啲。」

至於子華會不會做演唱會嘉賓？子華就話：「我已經發咗誓唔會做任何人演唱會嘉賓㗎啦。我現在鍾意拍嘢，我講真。（咁如果第日契仔Jazz開演唱會呢？） 等佢大個真係唱歌先講啦！」