繼劇集《絕代商驕》後，黃子華和佘詩曼（阿佘）於電影《棟篤特工》再度合作，今次黃子華化身成特工在戲中有多個爆笑造型亮相。

黃子華笑言造型多到記不到，一定要入場睇會感覺目不暇給，自己最喜愛戲中一幕的VR中的地府造型覺得最有趣，更笑謂場景的感覺好似去到日本的歌舞伎町。他說：「拍攝當晚霸住人哋條橋，仲拍得好刺激。有個人過嚟同我哋講：『呢條橋係我起㗎！依家唔畀你哋拍。』因為地府景喺條橋嗰度，我未見過有個人話條橋我起！大家即刻話對唔住阻住晒。所以透過尊重佢，尊重佢條橋。」

對於相隔7、8年再度合作，佘詩曼大讚黃子華一樣好有型，黃子華笑謂對方好大轉變，以前是「姐仔」，但今次經已是巨星。阿佘聞言即謂：「你仲勁啦！以前係人，依家你係神呀！」黃子華還擊笑謂指現時人多過神，但強調阿佘現今有巨星Feel，是大家所對其的認同。談到他被封為男神，子華說：「一路以來都係一個笑話，神多過人有乜所謂？！」

談到戲中有多位巨星客串演出，當中有鄭秀文、許冠文、楊千嬅等。黃子華直言原本一路無想過找巨星演出，因為其中寫的戲分指兩個巨星出事，自己打算找兩個演員演出，不過監製及導演認為一定要找巨星。他說：「我話兩個巨星（戲中）癩嘢，邊有巨星肯嚟做巨星癩嘢呢？點知佢哋真係搵到兩個巨星嚟，之後做落去每一日客串都係巨星。當然我相信唔好話碌我人情卡，我相信咁多位嚟係拯救我。好多謝佢哋咁多位朋友，但無一個係我搵。」

黃子華與佘詩曼合作電影《棟篤特工》。